دەما شاندەکێ پەکەکێ چووبوو مالا مالباتەکا گەرمیانی کو کورێ وان د ناڤ پەکەکێ دا ھاتیە کوشتن، شەر دەرکەت و مالباتێ شاندا پەکەکێ ژ مالا خوە ئاڤێتن دەرڤە.
ل گۆری ئاگاھیان، 5ێ ئادارێ، شاندەکێ پەکەکێ ب نوونەراتیا کەسەکی ب ناڤێ «وەھاب سمێل فش» و کەسەکی نەناس ب ناڤێ ھەڤال عەگید، چوونە مالا گەریلایەکی ب ناڤێ «محەمەد کاری» ل تاخا« سمۆد» یا باژارێ کەلارێ، ھەر دو کەس ب چەک و سیلەحان ژ ئەندامێن مالباتێ رە گۆتن کو کورێ وان بەری 3 سالان ھاتیە کوشتن، ل ور مالباتا گێریلا یەکسەر ژ وان رە گۆت: “باشە، پشتی سێ سالان ھوون ژ مە رە دبێژن کورێ وە ھاتیە کوشتن؟ وێ دەمێ چما تە ژ مە رە نەگۆت؟ چما وە پشتی ھەفتەیەکێ ژ مە رە نەگۆت ئەزبەنی، پشتی مەھەکێ؟” شاندا پەکەکێ ژ وان رە دبێژە ھایا وان ژێ نینە و ئەڤ فەرمان ژ ژۆر ڤە ھاتیە دایین. مالباتا شەھید ژ وان رە گۆت: “ئەڤ نە راست و سەختەیە، ئەگەر ھوون راست دبێژن جەنازەیێ کورێ مە بدن مە.”
ل سەر ڤێ یەکێ شاندا پەکەکێ وێنەیەک دەرخست و ژ وان رە گۆت: “ئەڤ جەنازەیێ کورێ وەیە، لێ ژ بەر کو ل زابێ ھاتیە کوشتن نایێ ناسکرن.” ل سەر ڤێ یەکێ ژی د ناڤبەرا وان و مالباتا گەریلایێ شەھید دا ئالۆزی دەرکەت.
خالێ کورێ وەفات کری مەحموود گەرمیانی ژی راگهاند: “پەکەکێ 3-4 رۆژان بەرێ گۆتبوو مە کورێ وە سێ سال بەرێ ھاتیە کوشتن، مە ژی گۆت وان چما وە وسا کر؟ گۆتن ل سەری ئەم هاتینە ئاگەهدارکرن، ئەم نزانین، دڤێت ل سەری بەرسڤێ بدن، مە جەنازە خواست، گۆتن 5 کەسن و جەنازەیێن وان بەرۆڤاژی کرنە.
ھەروھا مەحموود گەرمیانی دبێژە: “پەکەکێ ب شەڤ ب رێیا ھەڤالەکی کورێ برایێ من تەلەفۆنی وی کر و ژێ را گۆت کو حەمە ھاتیە کوشتن، دانێ سبەھێ ژی پەکەکێ تەلەفۆنی مامێ من کر و ژێ را گۆتن کو دێ سبە هێین مالا وە. مە دزانیبوو کو ئەڤ چیە، لێ مە گۆت بلا بهێن. دەما ھاتن مە گەلەک پرس ژ وان کرن، گۆتن نزانن چما دەرەنگ ھاتیە گۆتن. ئەم ب خەمگینی ل ھەمبەری وان دەرکەتن و ب ب توندی لگەل وان ئاخڤین، ئەم ل مالا خوە ب وان رە روو ب روو مان و مە جەنازەیێ کورێ خوە ژ وان خوەست.”
ھەروھا مەحموود گەرمیانی دبێژە: “کورێ مە زارۆک بوو و ھات خاپاندن. یێن کو دچن مەژیێ وان تێ شووشتن، زارۆک بوو، زارۆک ژ تشتێن حەرام حەز دکن و مە نزانیبوو کو چوویە. ئەم 3 جاران چوونە قەندیلێ و ل کودەرێ بپرسن، لێ ھەر جارێ دەرەو ل مە کرن، نھا ئەم دبێژن پەکەکێ تەرمێ کورێ مە ل کویە. ئەڤ برازیێ منێ زارۆک چاوا ھات کوشتن؟ پەکەکە خەلکێ ژ کەلارێ دبە، دو-سێ کەس ژ کەلارێ یێن چووین ناڤا پەکەکێ ڤەگەریانە، کەس راستیێ نابێژە. چما ئەڤ کەسە ڤەگەریان و یێن مە ھاتن کوشتن؟ کەس تشتەکی نابێژە مە.”
خالێ وی گەریلای دبێژە: “چ دەلیل ھەنە کو بالافرێ ئەو کوشتیە؟ وێنەیێن 5 کەسان نیشانی مە دان، دو عەرەب و یەک ژ باکور، کو ل زابێ ھاتبوون کوشتن. مە ژ پەکەکێ را گۆت بلا کورێ مە تەنێ تەلەفۆنێ بکە، لێ نەکرن. پەکەکە جارەکە دن مە نەخاپینە. پەکەکە ل سەر زارۆکێن گەرمیانێ کار دکە و مەژیێ وان دشۆ، لێ چ دایک و باب ناخوازن زارۆکێ خوە تەڤلی پەکەکێ بکن.”
