رێکەفتنا 11 ئادارێ بوویە بەلگەنامەیەکا یاسایی و دیرۆکی

رێکەفتنا 11 ئادارێ بوویە بەلگەنامەیەکا یاسایی و دیرۆکی

 53 سال بەریا نھا، د 11 ئادارا 1970 دا ب سەرۆکاتیا مەلا مستەفا بارزانی رێکەفتنەکا دیرۆکی د ناڤبەرا گەلێ کورد و حکوومەتا ئیراقێ دا ھات ئیمزاکرن، ب ئاوایەکی کو داخوازێن شۆرەش و گەلێ کوردستانێ پێک ھاتبوون. ئەو رێکەفتن و ناسینا مافێن کوردان، بووبوو ھەڤێنا بەشەکا مەزنا دەستکەفتێن ل پەی وێ.

رێکەفتن ژ 15 خالان پێک دھات، خالێن ھەری گرینگ، ناسینا مافێ ئۆتۆنۆمیێ یا باشوورێ کوردستانێ بوو، تەڤی وێ زمانێ کوردی ل دبستانان بهێت خواندن، ئەو جارا ئەول بوو کو حکوومەتا ئیراقێ مافێن گەلێ کوردستانێ ددا.

خالێن ھەری گرینگێن رێکەفتنا 11 ئادارێ:

– پرسا کورد د دەستوورا دەمکی یا ئیراقێ دا.

– د دەستووری دا وەکە نەتەوەیا عەرەب نەتەوەیا کورد ژی بهێت ناسین.

– گەلێ ئیراقێ ژ دو نەتەوەیێن سەرەکی پێک تێ، نەتەوەیا عەرەب و نەتەوەیا کورد، د دەستووری دا مافێن نەتەوی یێن کوردان و مافێن ھەموو کەمنەتەوەیان ھات ناسین د چارچۆڤەیا یەکیتیا ئیراقێ دا.

– زمانێ کوردی ل جەم زمانێ عەرەبی، ل دەڤەرێن کو پرانیا نشتەجیێن وان کوردن، بوو زمانێ پەروەردەھی و فێرکرنێ.

– دڤێت جیگرەکی سەرۆکۆمار کورد بت.

– گەلێ کورد ب رێژەیا نشتەجیێن خوە ل گۆر نشتەجیێن ئیراقێ، بەشداری دەستھلاتا یاسادانان ببە.

– ژ بۆ کوردان ئۆتۆنۆمی.

– بەشداربوونا کوردان د دەستھلاتێ دا و نەکرنا جوداکاریێ د ناڤبەرا کورد و عەرەبان دا.

– ژ بەر دوورخستنا وان د رابردوویێ دا کوردان ژ پەروەردە و فێرکرنێ زرار دیتنە، ژ ڤی ئالی ڤە پلانەک ژ بۆ چارەسەرکرنا ڤێ کێشەیێ بهێت دانین.

– ژ بۆ دەڤەرێن ئۆتۆنۆمیێ سەرژمێری بهێت کرن.

– ڤەگەراندنا خوەندەکارێن کو ژ دبستانان ھاتنە دوورخستن، یان ژ بەر توندیا ل دەڤەرێن خوە، نەچار بوونە کو دەست ژ خواندنێ بەردن.

– ل تەلەڤیزیۆنێن حکوومەتێ وەشانا بەرنامەیان ب زمانێ کوردی ژی ھەبن و گرینگی پێ بهێت دایین.

– قەبوولکرنا خوەندەکارێن کورد ل زانینگەھ و پەیمانگەھان و دایینا دەرفەتا خوەندنێ ب رێژەیەکا عادلانە ل دەرڤە و ل ناڤخوە.

– بەرپرس و فەرمانبەرێن ل یەکەیێن ئیداری کو پرانیا وان کوردن، دڤێت کورد بن، یان ژ وان کەسان بن کو کوردی باش دزانن.

– ڤەگەراندنا کوردان بۆ ئەرد و زەڤیێن خوە و جھێن کو بەرێ لێ بوون.

– بلەزکرنا پێکانینا یاسایا چاکسازیا چاندنیێ ل کوردستانێ و سەرەراستکرنا ب ئاوایەکی کو پاکتاوکرنا پێوەندیێن دەرەبەگی مسۆگەر بکە و ھەموو جۆتکار پارچەیێن ئەردێن گونجاو پێ بهێن دایین.

رێکەفتنا 11 ئادارێ دەستکەفتەکا گرینگا شۆرەشا ئیلۆنێ و خوەراگری و قوربانیدانا گەلێ کوردستانێ بوو ب رێبەریا مەلا مستەفا بارزانی ژ بۆ مافێن رەوا. ئەو رێکەفتن بوویە بەلگەنامەیەکا یاسایی و دیرۆکی و کەڤرێ بنگەھێ یێ ھەموو دەستکەفتێن کو پشترە ژ بۆ گەلێ کوردستانێ پێک ھاتن.

پوستێن ھەمان بەش