ئەنجوومەنا نشتیمانی یا کوردی ل سووریێ (ئه‌نه‌كه‌س) ئیرۆ د سالڤەگەرا سەرهلدانا 12ێ ئادارێ و رۆژا شەهیدێن کورد دە تەکەزیێ ل پاراستنا مافێن گەلێ کورد یێن رەوا د سووریایەکە فەدەرال، دەمۆکرات، فرەنەتەو و فرەئۆل دە دکە.
سەکرەتەریا گشتی یا ئه‌نه‌كه‌سێ ئیرۆ 12ێ ئادارا 2023ان پەیامەک ب بۆنەیا سەرهلدانا 12ێ ئادارا 2004ێ و رۆژا شەهیدێن کورد بەلاڤ کر و تێ دە راگهاند، ئیرۆ 19 سال د سەر سەرهلدانا 12ێ ئادارا 2004 پیرۆز رە دەرباس دبن کو هێزێن رەژیما سووریێ کۆمکوژیەکە هۆڤانە ل دژی گەلێ مە یێ کورد ل سووریێ پێک ئانی، وەکە ئێریشەکە پێشیلێگرتنێ ل دژی تێکۆشینا نەتەوی یا کورد، ئەو ژی پشتی پێشکەتنێن وێ دەمێ یێن ل هەرێمێ، پشتی رووخاندنا رەژیما دیکتاتۆرا خوینرێژ ل ئیراقێ و ژ بۆ چێکرنا ناکۆکیان د ناڤبەرا گەلێن عەرەب و کورد دە.
ئه‌نه‌كه‌سێ د داخویانیا خوە دە گۆت «ره‌ژیمێ سوود ژ لیستکا فوتبۆلێ یا د ناڤبەرا هەر دو تیمێن قامشلۆ و دێرەزۆرێ دە وەرگرت و ب گوللـەیێن راستەراست ل جوانێن کوردێن ل ستادیومێ رەشاندن. هەر وها رۆژا دن ژی د دەما مەراسیما ئۆغرکرنا شەهیدان دە، هەژمارا شەهیدان زێدەتر بوو کو و ئەڤ یەک بوو سەدەما دەرکەتنا سەرهلدانا گەلێ کورد ل هەموو دەڤەرێن کوردان ل سووریێ، ژ دێرکێ هەتا عەفرین، حەلەب و شامێ».
د داخویانیێ دە هات گۆتن: «گەلێ کورد د دیرۆکا تێکۆشینا خوە دە، ب ریا سەرهلدان و شۆرەشان، قوربانیێن گران ژ بۆ ئازادیێ دانە، ژ وان ژی شەهیدێن سەرهلدانا ئادارا 2004ێ کو خوینا وان یا پاک بوو هاندەرەکە مەزن ژ بۆ تەڤگەرا رزگاریخوازا کورد ل سووریێ و ژ بۆ پێشکەتنا دۆزا کوردی کو دەرباسی قۆناغەکە نوو یا تێکۆشینێ ل کوردستانا سووریێ بوو و پرسگرێکا کورد ژ چارچۆڤەیا خوە یا هەرێمی یا تەنگ بەر ب ئاسۆیێن ناڤنەتەوەیی ڤە بر و خستە رێزا مژارێن گرینگێن رۆژهلاتا ناڤین».
هەر وها گۆت: «ئه‌نه‌كه‌سێ ئەڤ رۆژ ژ بۆ شەهیدێن کورد ل کوردستانا سووریێ ژ بۆ رێزگرتنا ل خوینا وان یا پاک هلبژارت. بلا ئەڤ رۆژ وەک ناڤەکی گرینگ د دیرۆکا گەلێ مە و دۆزا وی یا نشتمانی دە بمینە، ژ بەر کو شەهید پرا کو کاروانێن ئازادیێ د سەر رە دەرباس دبنە».
ئه‌نه‌كه‌سێ د بەشەکە دن یا پەیاما خوە دە دبێژە، «د ڤێ بۆنەیا ب ئێش دە، ئه‌نه‌كه‌س تەکەزی ل سەر پێویستیا یەکدەنگی و یەکهەلوەستیا کوردی ل هەمبەر پرسێن نشتمانی، چارەنڤیس و داخوازێن گەلێ مەیێ کورد دکە و ئەو بەردەوامە د بەرەڤانیکرنا ل هەبوونا خوە یا رەسەن ل سووریێ و مافێن خوە یێن چارەنڤیسازێن رەوا د سووریایەکە فەدەرال، دەمۆکرات، فرەنەتەو و فرەئۆل دە کو مافێن هەموو پێکهاتەیێن گەلێ سووریێ د دەستوورا وێ دە پاراستی بن».
ئه‌نه‌كه‌سێ د داویا پەیاما خوە دە ئاماژە ب ئەردهەژا وێرانکەرا 6ێ سباتا بۆری ل باکور و رۆژئاڤایێ کوردستانێ، ترکیە و سووریێ دکە و هەڤخەمیا خوە یا کوور ب گەلێن سووریێ و ترکیێ رە و ب تایبەتی باژارێن عەفرین و جندرێسێ رە نیشان ددە. هەر وها دلۆڤانیا ژ شەهیدان رە و باشبوونا بلەز ژی ژ برینداران رە هێڤی دکە.
