گرووپەکێ سەر ب رێڤەبەریا خوەسەر ئەندامەکی پارتیا ئەل-وەحدە رەڤاند و ئەشکەنجە کر
ل کۆبانێ گرووپەکا چەکدار یا سەر ب رێڤەبەریا خوەسەر ڤە ئەندامەکی پارتیا یەکیتیا دەمۆکراتیکا کورد ل سووریێ (ئەل-وحدە) رەڤاند و ئەشکەنجە کر. پارتیا وەحدە ژی بانگ ل جڤاکا ناڤدەولەتی، رێخستنێن مافێن مرۆڤی و یاسایی دکن کو ڤان کریارێن ھۆڤانە راوەستینن.
رێخستنا کۆبانێ یا پارتیا وەحدە ئیرۆ 14 ئادارێ د داخویانیەکێ دا راگھاند، “دوھی 13 ئادارێ کۆمەکا چەکدارا رووپۆشا گرێدایی رێڤەبەریا خوەسەر رێھەڤالێ مە «عەنتار ئەلی» دەما کو ژ کارگەھا خوە ڤەدگەریا مالا خوەیا ل گوندێ «دادالیێ» رەڤاندن و ئەو برن جھەکی نەدیار و ب بۆریێن ئاسنی ب توندی ل وی خستن، کو بوو سەدەما شکاندنا لنگەکی وی و برینداربوونا چەند پارچەیێن دنێن لاشێ وی. پشتی کو رێھەڤالێ مە ژ بەر ئەشکەنجەیێ ژ ھشێ خوە ڤە چوو، ئەو ئاڤێتن سەر ریا ناحیا «شێخلەرا ژێرین». پشترا ژی مالباتا وی ئەو برن نەخوەشخانەیێ .”
د داخویانیێ دا ھات گۆتن: “ئەم وەک رێخستنا کۆبانێ یا پارتیا یەکتیا دەمۆکراتا کورد ل سووریێ، ڤان کریارێن ترسۆنەک و تێکدەرانە شەرمەزار دکن، ژ بەر کو خزمەتا دژمنێن گەلێ کورد دکن، گەفێ ل ئەولەکاری و ئارامیا گەلێ ھەرێمێ دخون، روویێ رێڤەبەریا خوەسەر رەش دکن و دبن سەدەما کۆچبەریا خەلکێ مایی.”
ھەر وھا رێخستنا کۆبانێ یا پارتیا ئەل-وەحدە بانگ ل جڤاکا ناڤدەولەتی، رێخستنێن مافێن مرۆڤی و یاسایی دکن کو ئەرکێن خوە ژ بۆ راوەستاندنا ڤان کریارێن ھۆڤانەیێن کو ل دژی ھەموو نرخێن مرۆڤی و دەمۆکراتیکن، ب جھ بینن.
