اژانسا نووچەیان یا ترکیێ راگھاند، ھەلیکۆپتەرا کو شەڤا بۆری ل دھۆکێ کەتبوو خوارێ و د ئەنجامێ دە چەند چەکدارێن پارتیا کارکەرێن کوردستانێ (پەکەکێ) تێ دە جانێ خوە ژ دەست داین، ژ بۆ شەرێ داعشێ رادەستی یەکیتیا نشتمانییا کوردستانێ (یەنەکێ) ھاتیە کرن.
ل گۆری نووچەیا خەبەر تورکێ، ھەلیکۆپتەرا کو شەڤا بۆری ل پارێزگەھا دھۆکێ یا ھەرێما کوردستانێ کەتیە خوارێ، ژ ئالیێ ھەڤپەیمانیا ناڤدەولەتی ڤە د چارچۆڤەیا ئالیکاریێن هەڤپەیمانیا ناڤدەولەتی ژ بۆی شەرێ ل دژی داعشێ ب یەکیتیا نشتمانییا کوردستانێ هاتیە دایین.
ئیرۆ رۆژا پێنجشەمی 16/3/2023ان دانێ سبێ، دژە تەرۆرا کوردستانێ د داخویانیەکی دە راگهاند، “شەڤا دەرباس بوویی 15 ئادارا 2023، دەمژمێر 20:40، ھەلیکۆپتەرەک ل نێزیکی گوندێ بێرکیات ل ناڤچەیا چەمانکێ یا پارێزگەھا دھۆکێ کەت خوارێ، و تەڤ کەسێن تێ دە جانێ خوە ژ دەست دان.” ئەڤ ژی ئەشکەرە کر کو: “ئالیێن تێکلدار یێن حکوومەتا هەرێما کوردستانێ پێوەندی ب حکوومەتا ئیراقێ، هەڤپەیمانیا ناڤدەولەتی و ترکیێ کریە و ئەو ژ کەتنا ڤێ فرۆکەیێ هایدار کرنە، لێ بەلێ د بەرسڤێ دە وان راگهاند کو فرۆکە یا وان نینە. ھێزێن ئەولەھیێ دەست ب لێکۆلینێ کرن و د لێکۆلینێن دەستپێکێ دە دەرکەت ھۆلێ کو ھەلیکۆپتەر ژ جورەیا Eurocopter AS350 بوویە و هندەک ژ کەسێن ب سەدەما کەتنە خوارا ڤێ فرۆکەیێ جانێ خوە ژ دەست دانە چەکدارێن پەکەکێ بوونە، لەکۆلین د ڤێ دەربارێ دە وێ بەردەوام بکە هەیا کو ئاگاهیێن تەمام دەربارا فرۆکەیێ وەرن دەست خستن کا سەر ب چ ئالیەکی یە.”
ئەڤ د دەمەکی دە یە کو یەنەکێ ھەتا نھا دەربارێ بوویەرێ دا ت داخویانی نەدایە.
