دەزگەها خێرخوازی یا بارزانی ئەشکەرە دکە، د هەیاما مەهەکێ دە 57 بارهلگرێن ئالیکاریێن مرۆڤی دەرباسی عه‌فرینێ و گوندێن وێ کرنە، 12 هەزار و 185 مالباتان ژی سوود ژ ڤان ئالیکاریان دیتنە.
دەزگەها خێرخوازی یا بارزانی د راپۆرتەکێ دە کار و چالاکیێن خوە یێن مەهەکێ ل عه‌فرینێ بەلاڤ کر. د راپۆرتێ دە هاتیە، ژ 10ێ مەها سباتێ و هەتا 10ێ مەها ئادارێ دە، وان 57 بارهلگرێن ئالیکاریێن مرۆڤی دەرباسی عه‌فرینێ و گوندێن وێ کرنە، د ڤێ هەیامێ دە 12 هەزار و 185 مالباتان سوود ژ ڤان ئالیکاریان وەرگرتنە.
دەزگەها خێرخوازی یا بارزانی دبێژە، تیمێن وان جهێ مانێ ژ بۆ 1400 مالباتێن زیاندیتی یێن ئەردهەژێ ل 25 گوند و 4 ناهیان دابین کرنە.
هەر وها ئەشکەرە کر ژی، تیمێن وان یێن تەندورستی ل وێ دەڤەرێ 7 هەزار و 247 کەس دەرمان کرنە، هەروها دەرمان ژی ل سەر وان بەلاڤ کرنە.
رۆژا 6ێ سباتا 2023ان ل ناڤچەیا پازارجخا مەرەشێ 2 ئەردهەژێن ب هێزا 7،7 و 7،6 روو دابوون. ئەردهەژێ باندۆرەکە وێرانکەر ل هەرێما عه‌فرینێ و ب تایبەت ل باژارۆکێ جندرێسێ و گوندێن وێ کر.
ل گۆری ئۆدەیا ئۆپەراسیۆنێن کارەساتێ یا ئەنجوومەنا خوەجهی یا جندرێسێ، 1012 کەسان د ئەردهەژێ دە جانێ خوە ژ دەست دانە، 1100 خانی زیان دیتنە.
وه‌قفا بارزانی رۆژا 10ێ سباتا 2023ان، وەک یەکەم دەزگەهە کو ئالیکاریێن مرۆڤی ب رێیا دەریێ باب ئەل-سەلامێ رە گهاندن عه‌فرینێ و گوندێن وێ و ژ وێ دەمێ ڤە ب بەلاڤکرنا ئالیکاریان ل سەر زیاندیتیێن ئەردهەژێ بەردەوامە.
