ئەنجوومەنا ئاساییشا هەرێما کوردستانێ، زانیاریێن زێدەتر ل سەر کەتنا هەلیکۆپتەرا شەڤا 15/16ێ ئادارێ ل پارێزگەها دهۆکێ بەلاڤ دکەت.
دەزگەها دژەتەرۆرا کوردستانێ راگهاند، شه‌ڤا 15 ئادارا 2023ێ هەلیکۆپتەرەک ل نێزیکی گوندێ بێرکیات یێ ناڤچەیا چەمانکێ یا سەر ب پارێزگەها دهۆکێ ڤە کەت خوارێ و د ئەنجامێ دە هەموو کەسێن تێدا جانێ خوە ژ دەست دانە کو ئەو ژی سەر ب په‌كه‌كێ ڤەنە.
رۆژا 17ێ ئادارێ ژی هه‌سه‌دێ د داخویانیەکێ دا راگهاند کو دو هەلیکۆپتەر کەتنە خوارێ و 9 کەسێن سەر ب هه‌سه‌دێ ڤه تێدا هاتنە کوشتن. لێ ئەنجومەنا ئاسایشا هەرێما کوردستانێ هەتا نها کەتنا هەلیکۆپتەرکێ و جانژدەستدانا 7 کەسان پشتراست دکەت.
ئەنجومەنا ئاسایشا هەرێما کوردستانێ راگهاند، ئەو هەلیکۆپتەر بێی ئاگاهدارکرنا سازیێن فەرمی یێن هەرێمێ د ناڤبەرا رۆژئاڤایێ کوردستانێ و سلێمانیێ دا فرین كری یه.
ل گۆری ئەنجومەنا ئاسایشا هەرێما کوردستانێ، ئەو هەلیکۆپتەر ل چەند بارەگەهێن پارێزگەها سلێمانیێ داکەتنە و بەر ب رۆژئاڤایێ كوردستانێ ڤە فرینه.
ئاماژە ب وێ یەکێ ژی کر، ئالیەک ل سلێمانیێ ب ئاوایەکی نهێنی و نەفەرمی په‌یوه‌ندیێن هه‌سه‌دێ و په‌كه‌كێ هێسان کرنە و ب ئاوایێن جودا ئالیکارییا وان کری یە.
حکوومەتا هەرێما کوردستانێ بانگ ل هێزێن هەڤپەیمانان و حکوومەتا فەدەرال کر کو ئەشکەرە بکه‌ن کو ئەڤ هەلیکۆپتەر ب کیژان دەستوورێ ل سەر خاکا هەرێما کوردستانێ دفرن و کی بەرپرسێ ڤان کریارێن نەیاسایی یە.
