ئیرۆ ل گەلەک باژارێن باکورێ کوردستانێ و ترکیێ جەژنا نەورۆزێ ب چەند چالاکیان تێ پیرۆزکرن. ئیسال ژ بەر ئەردھەژا روو دایە، نەورۆز دێ بێی گۆڤەند و شاھی وەرە پیرۆزکرن.
ھەدەپێ پێشتر راگھاندبوو، د چارچۆڤەیا چالاکیێن وان یێن نەورۆزێ دا، ئیرۆ ل باژارێن ستەنبۆل، ئزمیر، کۆچائەلی، مووگلا، دەنیزلی، ئانتالیا، ئەنقەرە، بوورسا، تاکیرداگ، ئایدن و مێرسین یێن ترکیێ و ھەر وھا ل وان، ئێلھ، تەتوان، قۆسەر، گەڤەر، دێرسم، چەولگ، مووش، ئیدر، سێرت و باژارێن دنێن باکورێ کوردستانێ ئاگرێ نەورۆزێ تێ ڤێخستن و نەورۆز تێ پیرۆزکرن.
نەورۆزا ئیسالا ل ستەنبۆلێ ب بانگا ھەدەپێ ڤە ل قادا یەنیکاپیێ 19 ئادارێ ب درووشمەیا “ھەر دەر نەورۆز، ھەر دەم ئازادی” دێ بێ پیرۆزکرن. ژ سالێن جوداتر نەورۆزا ئیسال ژ بەر ئەردھەژا روو دایە بێیی گۆڤەند و بێیی سترانێن کێفێ دێ ب ئاوایەکە خەمگنی وەرە پێشوازیکرن.
د نەورۆزێ دا ب نێزیکبوونا ھلبژارتنا سەرۆککۆماری و پارلامەنتەرییا ل ترکیێ کو 14 گولانێ دێ پێک وەرە، ل سەر ھلبژارتن و ھن مژارێن سیاسی ب تایبەت بۆ چارەسەرکرن پرسگرێکا کورد ھن پەیام ژ ھێلا ھەدەپێ ڤە دێ بێن بەلاڤکرن.
تێ چاڤەرێکرن، نەورۆز و میتینگا ھەری مەزن دێ رۆژا 21 ئادارێ ل دیاربەکرێ بێ لدارخستن.
