سەرۆکێ گشتییێ جەهەپێ و کاندیدێ ھەڤپەیمانیا ملەت کەمال کلچدارۆغلو، ل پارلامەنتۆیا ترکیێ لگەل ھەڤسەرۆکێن ھەدەپێ پەرڤین بولدان و میتحەد سانجار جڤیا. کلچدارۆغلو گۆت، د جڤینێ دا پرسگرێکێن سەرەکە گۆتووبێژ کرنە و ئەو ببریارن ھەموو پرسگرێکان ب ھەڤ را چارەسەر بکن.
سەردانا پاشخستییا سەرۆکێ گشتییێ پارتیا کۆمارییا گەل (جەهەپێ)، ل گەل ھەڤسەرۆکێن پارتیا دەمۆکراتیکا گەلان (ھەدەپێ) پشتی دو رۆژان پێک ھات.
کەمال کلچدارۆغلو ل پارلامەنتۆیا ترکیەیێ چوو جھێ فراکسیۆنا ھەدەپێ و لگەل ھەڤسەرۆک پەرڤین بولدان و میتحەد سانجار جڤیا. کلچدارۆغلو رەخنەیێن توند ل سیستەمێ قەیومان و بریارێن دادگەھان گرتن و گۆت، پرسا کورد ژی د ناڤ دە، ئەو کاندیدێ چارەسەرکرنا ھەموو پرسگرێکێن ترکیەیێ نە.
کلچدارۆغلو دیار کر: “پرسا کورد ژی د ناڤ دا، ناڤنیشانا چارەسەریا ھەموو پرسگرێکان پارلامەنتۆیا ترکیێیە. ھەبوونا پارلامەنتۆیێ ژ بۆ چارەسەرکرنا پرسگرێکانە. ژ دەستپێکا دامەزراندنا وێ ڤە، پرسگرێک ل وێ دەرێ ھاتنە چارەسەرکرن.”
ھەڤسەرۆکێن ھەدەپێ پەرڤین بولدان و میتحەد سانجار ژی دان خویاکرن، ئەو پارلامەنتۆیێ وەک جھێ چارەسەریا پرسا کورد و پرسگرێکێن بنگەھین دبینن و ب ڤێ ئارمانجێ ل پارلامەنتۆیێ پێشوازیا کلچدارۆغلو کرنە.
پەرڤین بولدان راگھاند: “ئارمانجا مەیا پێشوازیکرنا برێز سەرۆکێ گشتییێ جەهەپێ ل ڤێ دەرێ ئەڤە کو، مە خوەست ئەم ئاماژە پێ بکن جھێ چارەسەریا پرسا کورد پارلامەنتۆیە. ئەم ھێڤی دکن، ئەڤە ببە بۆنەیەکا دەستپەکرنا چارەسەریێ. مە بەحسا پرۆسەیا پشتی ھلبژارتنێ ژی کر. بەندەواریێن جڤاکێ بۆ ھەموو پرسگرێکان و پرسا کورد ژی مە ھەنە.”
میتحەد سانجار ژی دەستنیشان کر: “ئەم ڤێ سەردانێ گرینگ دبینن و مە گەلەک مژار گۆتووبێژ کرن. نھا قەیرانەکا مەزن ل ترکیەیێ ھەیە. ل سەر بنگەھێن دەمۆکراسی، مافێن مرۆڤان، داد و ئازادی پێویستی ب دەستپێکەکا نوو و بەرنامەیەکا نوو ھەیە. ناڤنیشانا چارەسەریا ھەموو پرسگرێکان پارلامەنتۆیە. ئەم دێ ناڤەرۆکا ھەڤدیتنێ ب دەزگەھێن خوەیێن پێوەندیدار و ھەڤبەشێن خوەیێن ھەڤپەیمانیێ گۆتووبێژ بکن و د ناڤا رۆژەک-دو رۆژان دا، بۆ رایا گشتی ب ئاوایەک بەرفرەھ ئەشکەرە بکن.”
ھەڤدیتنا ھەدەپێ ل گەل کاندیدێ ھەڤپەیمانیا ملەت و سەرۆکێ جەهەپێ پر گرینگ تێ دیتن، ژ بەر کو کورد و دەنگدەرێن ھەدەپێ د ڤێ ھلبژارتنێ دا دیارکەرن. ھەدەپێ بەریا نھا دابوو خویاکرن، ئەگەر لگەل کلچدارۆغلو رێکبکەڤن، ئەو دێ کاندیدێ خوە بۆ سەرۆککۆماریێ دەرنەخن و یەکسەر پشتەڤانیا کلچدارۆغلو بکن.
