شه‌ش سال ل سه‌ر ره‌ڤاندنا چالاکڤان و خەباتکار فوئاد ئیبراهیم ژ ئالیێ چه‌كدارێن په‌یه‌دێ ڤه دەرباس دبن، تەڤی کو هه‌سه‌دێ د داخویانیەکە فەرمی دە خوە وەکە بەرپرس د بەر رەڤاندنا وی دە دیتیە، لێ تا نها رێڤەبەریا په‌یه‌دێ ل سەر نەدیاکرنا جهێ وی رژدە.
د 24ێ ئادارا 2017ێ دا، چەکدارێن په‌یه‌دێ ل دەڤەرەکا ناڤبەرا گوندێ مامەشۆر و شەکرخاچێ ل دەردۆرا دێرکا رۆژئاڤایێ کوردستانێ دا، چالاکڤان فوئاد ئیبراهیم رەڤاند، تەڤی هەولێن بەردەوام، لێ تا نها بێسەرووشوونە، و چارەنڤیسا وی نەدیارە.
چالاکڤان فوئاد ئیبراهیم، وەک ئەندامێ ئەنجوومەنا نشتیمانی یا کوردی ل سووریێ بوو د گەلەک خوەپێشاندانێن ل دژی ره‌ژیمێ دە بەشداری کربوو، ژ بەر چالاکیێن خوە، ژ ئالیێ ره‌ژیمێ، و په‌یه‌دێ ڤە راستی ئاستەنگی و رێگریان دهات.
د 2 جۆتمەها 2016ێ، ژ بەر چالاکیەکێ هات رەڤاندن، و داوی جار د 24ێ ئادارا 2017ێ دا، چەکدارێن په‌یه‌دێ ئەو رەڤاند، و تا رۆژا ئیرۆ ده‌نگوباسێن وی هاتنە برین.
د ڤێ دەربارێ دە، پشتی کو دانوستاندن ناڤبەرا ئه‌نه‌كه‌سێ و په‌یه‌نه‌کێ دا دەست پێ کرن، ئه‌نه‌كه‌سێ لیستەیەک ژ ناڤێ 8 رەڤاندییان پێشکێشی هه‌سه‌دێ کر، هه‌سه‌دێ ژی ژ ئالیێ خوه ڤە، داخویانیەک د 10ێ چلەیا 2020ێ دا بەلاڤ کر و بەرسڤا ئه‌نه‌كه‌سێ دا و تێدا رەڤاندنا فوئاد ئیبراهیم و ئەمیر حامد ل خوە گرت و بەرپرسیارەتیا رەوشتی ژ بۆ دیارکرنا چارەنڤیسا وان دا دیارکرن و راگهاند کو لێپرسین و ڤەکۆلین د دەربارێ هەردو ناڤان دە بەردەوامن.
ل شوونا کو چارەنڤیسا رەڤاندیان دیار بکە، بەروڤاژی وێ، په‌یه‌دێ کریار و رەفتارێن خوە د دەرمافێ ئه‌نه‌كه‌سێ و په‌ده‌كه-سێ دە گورتر کری یە.
