پۆلیسێن لەشکەری یێن ل باژارۆکێ جندرێسێ ب دارێ زۆرێ رووپەلێن سپی ب ئەندامێن مالباتا شەھیدێن نەورۆزێ ددن ئیمزەکرن و مالبات ژی بانگ ل رێخستنێن مرۆڤی و یاسایی دکە کو بلا رێ نەدن کو لیستن ب دۆزە بێ کرن.
شەڤا 20 ئادارێ ل باژارۆکێ جندرێسێ یێ سەر ب ھەرێما عەفرینێ ڤە، ھەژمارەک ژ گرووپا چەکدارا ب ناڤێ جەیش ئەل-شەرقیە ژ بەر ڤێخستنا ئاگرێ نەورۆزێ، گولـلە ل مالباتەکا کوردا ب ناڤێ (مالباتا پێشمەرگ) رەشاندن و د ئەنجامێ دا 3 برا و کورێ برایەکی شەھید بوون و 2 کەس ژی بریندار بوون.
رێخستنا مافێن مرۆڤان ل عەفرینێ ئیرۆ د راپۆرکێ دا بەلاڤ کر، دوھی 27 ئادارا 2023، دادوەرێ لێپرسینێ تاھا رەشوانی لگەل 6 ئەندامێن ژ پۆلیسێن لەشکەری دەربارێ کوشتنا شەھیدێن شەڤا نەورۆزێ ل جندرێسێ دا، لێپرسین لگەل 4 ئەندامێن مالباتا شەھیدان کرن، ئەو ژی ئەڤن: ئەشرەف محەمەد عۆسمان، محەمەد نەزمی عۆسمان، ئەمینە جابۆ و ئیسماعیل سلێمان محەمەد.
رێخستنا مافێن مرۆڤان دبێژە، پشتی بداویبوونا لێپرسینێ، دادوەرێ لێپرسینێ تاھا رەشوانی لگەل 3 پۆلیسێن لەشکەری ژ مالێ دەرکەتن، لێ 3 پۆلیس ژی د ھوندرێ مالێ دا مان و رووپەلێن سپی یێن تایبەت ب لێپرسینان دەرخستن و 5 ئەندامێن دنێن مالباتێ نەچار کرن کو ل سەر وان رووپەلێن سپی ئیمزا بکن.
کەسێن کو ب دارێ زۆرێ ئیمزایێن وان ھاتنە برن ئەڤن: رۆشین محەمەد عۆسمان، ھێڤین عسمەت ئیبراھیم، یاسمین مستەفا، ئەڤریزان عۆسمان و محەمەد محەمەد عۆسمان.
د ڤێ دەربارێ دا، مالباتا شەھیدان بانگ ل ئالیێن پێوەندیدار، سازیێن ناڤدەولەتی و رێخستنێن مافێن مرۆڤان دکە کو فشارێ ل ئالیێ بەرپرسیار بکن، دا کو یاریان ب لێپرسینان نەکن و وان نەگوھرن، ژ بەر کو ئیمزایێن 5 ئەندامێن مالباتێ د بن زەخت و زۆرێ دا ھاتنە برن.
رێخستنا مافێن مرۆڤان ژ بەر ڤێ یەکێ ژی، داخوازا کۆمیتەیەکا لێکۆلینێ یا ناڤدەولەتی و سەربخوە دەربارێ ڤێ تاوانێ دکە و بانگ ل کۆمیتەیا ناڤدەولەتی یا سەربخوە یا تایبەت ب سووریێ ڤە و رێخستنێن ناڤدەولەتی دکە کو باوەریێ ب کۆمیتەیێن گرێدایی ھەڤپەیمانیا ئۆپۆزیسیۆنا سووریێ (ئیتیلاف) و حکوومەتا وێ یا دەمکی نەکن.
