عەلی تەتەر: شەرێ پەکەکێ رێژەیا بێکاریێ ل دھۆکێ زێدە کریە

 پارێزگارێ دھۆکێ دبێژە، شەرێ پەکەکێ ل وێ پارێزگەھێ، بێکاری زێدە کریە و ئەشکەرە کر ژی، ژ بەر شەرێ پەکەکێ زێدەتری 330 گوند ڤالا بوونە.

پارێزگارێ دوھۆکێ عەلی تەتەر د بەرسڤا پرسەکا پەیامنێرێ ک24ێ دا راگھاند، یەکەم سەدەما بلندبوونا رێژەیا بێکاریێ ل پارێزگەھا دھۆکێ، ژ بەر زیانێن شەرێ پەکەکێ ل سەر پارێزگەھا مە یە.

عەلی تەتەر گۆت ژی: “پرانیا گوندیان ژ بەر پەکەکێ، نکارن ڤەگەرن سەر جھ و وارێن خوە، ژ بەر وێ ژی، ئەو بێکار مانە.”

ھەر د ڤێ مژارێ دە، سەرۆکوەزیرێ ھەرێما کوردستانێ مەسروور بارزانی رۆژا ٨ێ ئادارێ گۆتبوو: زێدەتری 800 گوندێن ھەرێما کوردستانێ ژ بەر شەر و پەڤچوونێن پەکەکێ وێران بوونە و حکوومەتا ھەرێما کوردستانێ نەکاریە وان ئاڤەدان بکە.

سەرۆکوەزیر مەسروور بارزانی گۆت ژی: “بێگومان ھەلوەستا مە ئەوە کو دڤێت ئەڤ شەرە ب داوی ببە، دا کو ئەم کاربن خەلکێ ڤەگەرینن وان ناڤچەیان.”