ژێدەرەکی ئاگەهدار ژ ک24ێ رە ئەشکەرە کر، حکوومەتا هەرێما کوردستانێ و حکوومەتا فەدەرال ل سەر هه‌ناردەکرنا پەترۆلێ ژ هەڤ نێزیک بوونە.
ل گۆر هەمان ژێدەری، حكوومه‌تا هەرێما کوردستانێ و حكوومه‌تا فەدەرال دانوستاندنان دکن و نێزیکی قۆناغێن داوی یێن رێکكەفتنا هه‌ناردەکرنا پەترۆلا هەرێما کوردستانێ بوونە.
هەر وها ئەشکەرە کر، ژ بۆ چارەسەرکرنا کێشەیان، سەرۆکوەزیرێ حكوومه‌تا هەرێما کوردستانێ مەسروور بارزانی زوو ب سەرۆکوەزیرێ ئیراقێ و گەلەک ئالیێن ناڤدەولەتی رە کەتە ناڤا دانوستاندنان و رازی نەبوو دەست ژ مافێن دەستووری یێن گەلێ هەرێما کوردستانێ بەردە.
د ڤێ دەربارێ دە سەرۆکوەزیر مەسروور بارزانی د پەیامەکێ دە ژ بۆ کەسێن کو هەول ددن بێهێڤیبوونێ بەلاڤ بکن و پێگەها هەرێمێ تێک ببن، گۆتبوو: «یێن کو ئیرۆ ل گەل مە ناسەکنن، بلا سبە خوە نەکن خوەدیێ دەستکەفتێن مە و سوودێ ژ سەرکەفتنێن مە وەرنەگرن».
هەر وها وی ژێدەری گۆت: هەولێر، به‌غدا و جڤاکا ناڤدەولەتی راگەهاندنە کو راوەستاندنا هه‌ناردەکرنا پەترۆلێ نە د بەرژەوەندیا ت کەسی دە یە و باندۆرەکە نەرێنی ل سەر داهاتا گشتی یا ئیراقێ و بازارا جیهانی یا پەترۆلێ دکە.
پشتی بریارا دادگەها حاکما فرانسایێ، هه‌ناردەکرنا پەترۆلا هەرێما کوردستانێ د 25ێ ئادارا 2023ان دە بۆ بەندەرا جەیهانێ هات راوەستاندن. ل سەر فەرمانا سەرۆکوەزیرێ هەرێما کوردستانێ مەسروور بارزانی، رۆژا دن شاندا حكوومه‌تا هەرێما کوردستانێ ژ بۆ گۆتوبێژکرنا ڤێ مژارێ و گهیشتنا رێکەفتنێ سەردانا به‌غدایێ کر و هەتا نها گوفتوگۆ بەردەوامن.
