بالیۆزخانەیا ئه‌مه‌ریكا ل شامێ کۆمکوژیا شەڤا نەورۆزێ ل باژارۆکێ جندرێسێ یێ سەر ب عەفرینێ ڤە شەرمەزار دکە و بانگ ل راوەستاندنا ئێریشێن ل دژی سڤیلان دکە.
بالیۆزخانەیا ئه‌مه‌ریكا ل شامێ شەڤا بۆری تویته‌ك دەربارێ کۆمکوژیا شەڤا نەورۆزێ یا ل جندرێسێ دە بەلاڤ کر و تێ دە راگهاند: «توندوتویژیا کو رۆژا 20ێ ئادارێ ل جندرێسێ هاتیە کرن، ئارامیا سووریێ دخە مەترسیێ».
هەروه‌ها بالیۆزخانەیا ئه‌مه‌ریكا ل شامێ بانگ ل هەموو ئالیان کر کو ئێریشێن ل دژی سڤیلان راوەستینن و لێپرسینێ دەربارێ ڤێ کۆمکوژیێ دە بکن.
شەڤا 20ێ ئادارا 2023ێ ل باژارۆکێ جندرێسێ یێ سەر ب هەرێما عەفرینێ ڤە، هەژمارەک ژ چەکدارێن گرووپا جەیش ئەل-شەرقیە ژ بەر ڤێخستنا ئاگرێ نەورۆزێ، گوللـە ل مالباتەکە کورد یا ب ناڤێ (پێشمەرگ) رەشاندن و د ئەنجامێ دە 3 برا و کورێ برایەکی شەهید بوون و 2 کەس ژی بریندار بوون.
پشتی ڤێ تاوانا هۆڤانە ژی، کارڤەدانێن توند، نەرازیبوون و خوەپێشاندانێن بەرفرەهـ ل سەر ئاستا ناڤخوە و دەرڤە دەرکەتن، تێ دە خوەپێشاندەران ئەڤ کۆمکوژی شەرمەزار کرن، داخوازا دادگەهکرنا تاوانباران ل دادگەهەکە ناڤدەولەتی کرن، هەر وها داخوازا دەرکەتنا چەکداران ژ ناڤا گوند و باژاران کرن و رێڤەبەریا هەرێما عەفرینێ بۆ خەلکێ هەرێمێ یێ رەسەن بێ رادەستکرن.
