کەسێ کو جەحشان سڤکاتی پێ کری کییە؟
نێزی 5 رۆژانە مژارا گرتنا کەسەکی ژ ئالیێ کۆمەک جەحشێن ترکیێ ڤە ل دەشتا هەزەخێ د سۆسیال مەدیایێ دە جی گرتیە و بوویە مژارا هەری گەرم د ناڤا کوردان دە، ڤێ ڤیدیۆیێ دلێ هەر کوردەکی ئێشاند، ژ بەر کو ژ ئالیێ وان جەحشان ڤە سڤکاتیەک هەری مەزن ب وی کەسی تێ کرن، هەموویان جەحش ژ بەر ڤی کارێ دوور ژ ئەخلاق رەخنەکرن، پشترە دیار بوو ئەڤ کەس گەریلایەکی پەکەکێ یە، لێ بەلێ، ت کەسی پەکەکە رەخنە نەکر و نەگۆت، چما گەریلایەکی پەکەکێ ب ڤی ئاوا ب تەنا سەرێ خوە، بێی چەک و بێی نان و هتد… ل ور دگەرە، چ قەومیە کو پەکەکێ ئەڤ گەریلایێ خوە ب ڤی ئاوا بێ نرخ کریە و ل ژین و ژیارا وی یا ل چیا ناپرسە، ئەڤ پرسە و ب دەهان پرسێن دن هەبوون کو پێدڤی بوو هەر کەس ژ پەکەکێ بپرسە و رەخنە بکە، لێ ت کەسی پەکەکە رەخنە نەکر.
کەسێ هاتیە گرتن کییە؟
کەسێ کو د ڤیدیۆیێ دە خویا دبە، ناڤێ وی «سەلیم ئادیامان»ە کو د ناڤا پەکەکێ دە ب «هارون ئەلبەک» تێ ناسکرن، ئەو یەک ژ شەرڤانێن هەپەگێ یە، پشتی کو ئەو ب تەنا سەرێ خوە ل چیا دمینە، ژ نەچاری دادکەڤە دەشتا هەزەخێ و ل گوندێ زەرگوز “یاڤشان” ژ ئالیێ جەحشان ڤە تێ گرتن، یەکەم جار جەحش ووسا دفکرن ئەو ژ بووی کو دزیان بکە نێزی وان بوویە، لێ بەلێ پشترە خوەیا دبە ئەو چەکدارەکی پەکەکێ یە، جەحش پشتی سڤکاتیەک مەزن ل وی دکن، پشترە رادەستی جەندرمەیێن ترکیێ دکن.
د ڤێ دەربارێ دە، وەزارەتا ناڤخوەیا ترکیێ راگھاند کو د ئۆپەراسیۆنا شرنەخێ دە گەریلایێ پەکەکێ سەلیم ئادیامان ھاتیە گرتن. ل ئالیێ دن ھەپەگێ راگھاند کو سەلیم ئادیامان ژ ئالیێ کۆمەکێ ڤە ھاتیە گرتن و ھاتیە رادەستکرن.
وەزارەتا کارێن ناڤخوەیی یا ترکیێ د 27 ئادارێ دا د داخویانیەکێ دا راگھاندبوو کو د ئۆپەراسیۆنا ل ھەرێما زەرگووزا ناڤچەیا ھەزەخا شرنەخێ دا گەریلایەکی پەکەکێ ب ساخی ھاتیە گرتن.
پشتی 4 رۆژان ژ نوو پەکەکێ داخویانی دا
باسکێ لەشکەری یێ پەکەکێ، ھێزێن پاراستنا گەل (ھەپەگێ) پشتی بۆرینا 4 رۆژان هەر وەک ئەڤ کەس نە چەکدارێ وان بە، هەر وەک ژیانا وی چ گرنگیەک نەبە، ژ نوو ڤە د دەربارێ مژارێ دا داخویانیەک پارڤە کر.
د داخویانیێ دا ھات دیارکرن کو سەلیم ئادیامان دەما کو ب تەنا سەرێ خوە مایە نەچار مایە داکەڤە دەشتێ و “بێچەک و د رەوشەکە زەھمەت دە بوویە.”
د داخویانیا ھەپەگێ دە چ تشتەکی نوو نەبوو، ب تەنێ دیمەنێن سڤکاتیکرنا ل وی چەکدارێ پەکەکێ کو جەحشان ب خوە پارڤەکربوو هات بەحسکرن، د دەمەکی دە کو پێدڤی بوو هەپەگێ د داخویانیا خوە دە ئەڤ یەک ئەشکەرە کربا کا سەدەم چییە ئەڤ چەکدارێ وان ب تەنا سەرێ خوە ل چییا مایە و چ ب سەرێ هەڤالێن وی هاتیە؟
چما ئەڤ گەریلا دادکەڤە دەشتا هەزەخێ؟
چاڤکانیێن هەرێمی ووسا ددن ئەشکەرەکرن، سەلیم ئادیامان خواستیە ژ پەکەکێ ڤەقەتە لۆما ژ یەکینەیا خوە یا تایبەت دوور دکەڤە و خوە ل جیەکی ڤەدشێرە، پشتی ب داویبوونا خوارنا ب وی رە ئەو نەچار دمینە داکەڤە گوندەکی دەشتا هەزەخێ و ل ور ل خوارنێ بگەرە، دەما پەکەکە ب ڤێ یەکێ دزانە وی ئێخبار دکە و ب دەستێ جەحشان ددە گرتن.
چاڤدێرێن سیاسی د ڤێ دەربارێ دە چ دبێژن؟
هن ژ چاڤدێرێن سیاسی د ڤێ باوەرێ دە نە کو ئەڤ ب تەنێ سەناریۆیەکە گەمارە کو پەکەکێ دروست کریە ژ بۆی کو ژ ئالیەکی گەریلایان ژ ڤەقەتینا ژ رەفێن خوە پووشمان بکە، وان بترسینە و ژ وان رە ووسا بدە خویاکرن کو ئەڤ عاقوبەتا هەر گەریلایەکی یە کو ژ پەکەکێ ڤەقەتە، یان وێ وەرە کوشتن، یان ژی وێ ب دەستێ جەحشان وەرە گرتن و هەقارەت پێ کرن، ژ ئالیەکی دن ژی هەستێن خەلکێ بۆ خوە راکێشە.
