ئه‌نه‌كه‌سێ دەربارێ زۆرداریێن کو ل ئێزدیێن عه‌فرینێ تێن کرن داخویانیەک بەلاڤ کر

ENKS-efrin-ezidi

ئەنجوومەنا نشتمانی یا کوردی ل سووریێ «ئه‌نه‌كه‌س» داخویانیەک دەربارێ زۆرداریێن کو ل ئێزدیێن هەرێما عه‌فرینێ تێن کرن بەلاڤ کر و بانگ ل رێخستن و سازیێن ناڤدەولەتی یێن پێوەندیدار کر کو رێگریێ ل ڤان زۆردارییان بگرن.

رۆژا 1ێ نیسانێ گرتە ڤیدیۆیەک بەلاڤ بوو، تێ دە مەلایەکی عەرەب دئاخڤە و دبێژە کو 2 کوردێن ئێزدی دەست ژ ئۆلا خوە بەردانە و دەرباسی ناڤا ئۆلا ئیسلامێ بوونە.

سەکرەتەریا گشتی یا ئه‌نه‌كه‌سێ ل سەر ڤێ یەکێ د داخویانیەکێ دە راگهاند، د پێشهاتەکە مەترسیدار دە، بنپێکرنێن کو ل هەمبەر خەلکێ عه‌فرینێ ژ ئالیێ کۆمێن چەکدار ڤە تێن کرن، دەرباسی ئاستەکە دن بوویە کو بێی هەبوونا رێگریەک یاسایی و ئەخلاقی، زۆری ل ئۆل و باوەریا خەلکێ تێ کرن.

ئه‌نه‌كه‌س دبێژە، ژ رۆژا 1ێ نیسانێ ڤە نووچەیا دو کوردێن ئێزدی یێن ل هەرێما عه‌فرینێ تێن بەلاڤکرن کو ئەو ئۆلا خوە دگوهێرن و دەرباسی ناڤا ئۆلا ئیسلامێ دبن. د ڤێ ئاتمۆسفەرا کو هەر کەس پێ دزانە دە، ئەڤ یەک زۆرەک ل ئێزدیانە، نە تشتەکی دنە.

د داخویانیێ دە تێ گۆتن، ئه‌نه‌كه‌سه‌ هەموو شێوەیێن بنپێکرنان و د هەمان دەمێ دە ئێریشا ل سەر باوەری و ئۆلێن خەلکێ و ئازادیا وان ب توندی شەرمەزار دکە. ئێزدی ژ گەلێ کوردن، دڤێ رێز ل وان وەرە گرتن و پاراستن و هەر ئێریشەک ل سەر وان، بنپێکرنا ئۆلا ئیسلامێ یە ژی.

ئه‌نه‌كه‌سه‌ هەروه‌ها بانگ ل رێخستنێن ناڤدەولەتی و مرۆڤی و سازیێن ناڤدەولەتی یێن پێوەندیدار دکە کو پێشی ل ڤێ رەفتارێن کو ل دژی هەموو نرخ و پرەنسیپێن مافێن مرۆڤانە، بگرن.

پوستێن ھەمان بەش