کۆمەلەیا مافێن مرۆڤان یا شاخا دیاربەکر ل سەر کوشتنا مکایل ئەکینجی ژ ئالیێ ھێزێن ئەولەکاریێ ڤە، ئاماژە کر کو د شیاندا بوو بێیی کو چەک بهێن بکارئانین مکایل بهێت گرتن و مافێ ژیانێ ھاتیە بنپێکرن.
د 1ێ نیسانێ دا ل گوندێ ب ناڤێ گولباخچا یا سەر پیران یا دیاربەکر ڤە وەلاتیێ ب ناڤێ میکایل ئەکینجیێ کو دەربارێ وی دە بریارا گرتنێ ھاتبوو دایین ژ ئالیێ ھێزێن ئەولەکاریێ ڤە ھات کوشتن.
ھێزێن ئەولەکاریێ ئاماژە کرن کو دەربارێ میکایل ئەکینجی دا بریارا گرتنێ ھاتبوو دایین و بانگ ل میکایل ئەکینجی ھات کرن کو بسەکنە و خوە رادەست بکە لێ میکایل ئەکینجی نەسەکنی و رەڤیا و ھێزێن ئەولەکاریێ ژی ژ بۆ وی بسەکنینە چەک ب کار ئانی.
کۆمەلەیا مافێن مرۆڤان یا دیاربەکر ژی دەربارێ بوویەرێ دا ل گوند لێکۆلین کر و سەرۆکێ کۆمەلەیا مافێن مرۆڤان یێ شاخا دیاربەکر عەبدوللا زەیتون دا زانین کو ل گۆری لێکۆلینێن وان ھێزێن ئەولەکاریێ ب درۆن و ھەلکۆپتەر و گەلەک وەسایتێن سەربازی و ب ھژمارەکە زێدە یا لەشکەران چوونە جھێ بوویەرێ و ل گۆری شەرت و مەرجان و ئاخافتنا شاھدحالان د شیاندا بوو کو بێیی کو چەک بهێت بکارئانین مکایل بھاتبا گرتن؛ لێ ب ئاوایەکی کەیفی گاڤ ھاتیە ئاڤێتن و مافێ ژیانێ ھاتیە بنپێکرن و ھەر وھا وەلاتیێن گوند ژی راستی گەفخوارن، ئێشکەنجە، کریارێن خراپ ھاتنە، دیمەنێن کامیرایێ ھاتنە ژێبرن و تەلەفۆنێن دیمەن کێشانە ژی ھاتنە شکاندن.
ئەندامێ هێزا ئەولەکاریێ یێ کو بوویە سەدەما کوشتنا میکایل ئەکینجی د ئیفادەیا خوە دا گۆتبوو “ئارمانجا وی نە کوشتن بوو و ب کەلەجانا دەما بوویەرێ وی گولە بەردایە ژ بەر کو دەما میکایل درەڤیا بەر ب وان ڤە ژی گولە بەرددا.”
لێ ل گۆری راپۆرتا جھێ بوویەرێ قالکێن گولەیان یێن کو تێ گۆتن ژ ئالیێ مکایل ڤە ھاتنە بەردان نەھاتنە دیتن.
