ئەنەکەسێ ل دربێسیێ کوشتنا وەلاتیێن کورد ل جندرێسێ شەرمەزار کر

ل دربێسیێ ئەنەکەسێ د چالاکیەکێ دا کۆمکوژیا جندرێسێ شەرمەزار کر و ئالیگرێن ئەنەکەسێ داخوازا دەرخستنا گرووپێن چەکدار ژ ھەرێما عەفرینێ کرن.

ئەنەکەسێ ل باژارێ دربێسیێ یێ رۆژئاڤایێ کوردستانێ خوەپێشاندانەک ژ بۆ شەرمەزارکرنا کۆمکوژیا شەڤا نەورۆزێ یا ل جندرێسێ ساز کر.

ئەو چالاکی دوھ دەمژمێر 11:00 سبەھێ ل ناڤا بازارا باژارێ دربێسیێ ھات لدارخستن، تێدا کوشتنا وەلاتیێن کوردێن جندرێسا عەفرینێ د ئێڤارا نەورۆزا ئیسال دا ھات شەرمەزارکرن.

ئالیگرێن ئەنەکەسێ و بەشدارێن د چالاکیێ دا ھەروھا داخوازا سزادانا تاوانبارێن کۆمکوژیا جندرێسێ و دەرخستنا چەکداران ژ ناڤ باژار و باژارۆکێن عەفرینێ کرن.

ئەندامێ ئەنجومەنا خوەجھی یا دربێسیێ یا ئەنکسێ، نیزامەدین عەلیکۆ راگھاند، “ئیرۆ ئەم وەک ئەنجومەنا خوەجھییا باژارێ دربێسیێ و گوندەوارێن وێ ئەم دەرکەتن چالاکیەکێ ژ بۆ شەھیدێن عەفرینێ، شەھیدێن جندرێسێ. وەک ئەم دزانین دەما خەلکێ مە د 20 ئادارێ دا ئاگرێ نەورۆزێ هەلدکر، مخابن ھێزێن تەرۆرێ و ھێزێن رادیکال ملەتێ مەیێ سڤیل گولەباران کرن کو د ئەنجامێ دا 4 خۆرت شەھید کەتن.”

سەرۆکێ ئەنجومەنا خوەجھییا دربێسیێ یا ئەنەکەسێ، ئدریس شێخ خەلەف ژی دیار کر، خەلکێ کورد ل جندرێسێ ل بەر مالا خوە ئاگرێ نەورۆزێ کو سەمبۆلا ئازادی و ئاشتیێیە، پێخستن لێ ئەو خەلکێن سڤیل ھاتن گولەبارانکرن.

ئدریس شێخ خەلەف گۆت، “دڤێت سینۆرەک ژ بۆ وان چەکداران بێ دانین، و ژ ھوندرێ باژار و مالێن کوردان دەرکەڤن.”