ناڤەندا راگهاندن و چاپەمەنیێ یا هه‌سه‌دێ دەربارێ ئێریشا ترکیێ یا ل سەر فرۆکخانەیا ناڤدەولەتی یا سلێمانیێ دە ئاگاهیێن نوو دان و ئاشکەرە کر، فەرماندارێ گشتییێ هه‌سه‌دێ مەزلووم عه‌بدی د دەما ئێریشێ دە ل سلێمانیێ بوو و ب سەلامەتی گهیشتیە ناڤچەیێن باکور و رۆژهلاتێ سووریێ.
رێڤەبەرێ ناڤەندا راگهاندنێ یا هێزێن سووریەیا دەمۆکراتیک (هه‌سه‌د) ئیرۆ 8ێ نیسانا 2023ێ د داخویانیەکێ دە ئاماژە ب وێ یەکێ کر، وان ب زانەبوون ئاگاهیێن دەربارێ ئێرشا ترکیێ یا ل سەر فرۆکخانەیا سلێمانیێ دە گرتن، تا کو ئەولەهیا فەرمانداریا گشتییێ هه‌سه‌دێ مەزلووم عه‌بدی بپارێزن و ئەوێ پشترە هوورگلیێن ئێریشا ل سەر فرۆکەخانەیا سلێمانیێ بوەشینن.
د داخویانیا رێڤەبەرێ ناڤەندا راگهاندنێ یا هه‌سه‌دێ فەرهاد شامی دە هات گۆتن: «د چارچۆڤەیا بەرسڤدایینا ئەولەهیێ یا بلەزا تێکلداری ئەولەکاریا سەرکردایەتیا هێزێن مە دە، ناڤەندا راگهاندنێ ب زانەبوون زانیاریێن ل سەر ئێریشا ترکیێ ل سەر فرۆکخانەیا سلێمانیێ د دەما هەبوونا فەرماندارێ گشتییێ هێزێن مە مازلووم عه‌بدی لێ نەدان، هەتا هاتنا وی یا ب ئەولە بۆ هەرێمێن باکور و رۆژهلاتێ سووریێ، کو ت زیان چێنەبوونە، ئەمێ هوورگلیێن ئێریشێ پشترە بوەشینن».
ئەڤ داخویانی پشتی وێ تێ، دوهی ناڤەندا راگهاندنێ یا هه‌سه‌دێ نووچەیێن کو دبێژن کو فەرماندارێ گشتییێ هه‌سه‌دێ مەزلووم عه‌بدی د دەما ئێریشا ترکیێ ل سەر فرۆکخانەیا سلێمانیێ دە، ل باژارێ سلێمانیێ نوو رەد کربوو و گۆتبوو کو مەزلووم عه‌بدی ل سەر کارێ خوەیە.
ئاساییشا فرۆکەخانەیا ناڤدەولەتی یا سلێمانیێ دوهی راگهاندبوو کو دانێ ئێڤارێ دەمژمێر 16:18 دە ل نێزی تێلا فرۆکەخانەیا ناڤدەولەتی یا سلێمانیێ تەقینەک پێک هات و د ئەنجامێ دە ت زیانێن جانی چێنەبوون، لێ ئاگر پێکەت و ژ ئالیێ بەرەڤانیا سڤیل ڤە هات کۆنترۆلکرن.
ژ ئالیێ خوە ڤە مەدیایا ئیراقی راگهاند، بوویەرا ل فرۆکخانەیا سلێمانیێ د ئەنجاما ئێرشا درۆنێن ترکیێ دە بوو و فەرماندارێ گشتییێ هێزێن سووریەیا دەمۆکراتیک (هه‌سه‌د) مازلووم عه‌بدی ژی ژ هەولەکە کوشتنێ رزگار بوو.
