چەکدارێن گرووپا فەیلەق ئەل-شام یا گرێدایی ترکیێ کەتنە مالێن 2 وەلاتیێن کورد ل گوندێ خەزێویێ یێ هەرێما عه‌فرینێ و تالان کرنە.
رێخستنا مافێن مرۆڤ ل عه‌فرینێ راگهاندیە کو چەند چەکدارێن گرووپا فەیلەق ئەل-شام ل گوندێ خەزێویێ یێ هەرێما عه‌فرینێ ب به‌هانه‌یا لێگەرینێ کەتنە مالا وەلاتیێ ب ناڤێ عۆمەر نەزمی جمۆ و دزی ژ مالێ کرنە.
ل گۆر زانیاریێن کو وێ رێخستنێ بەلاڤ کرنە، چەکداران ل مالا عۆمەر نەزمی جمۆ 3000 لیرەیێن ترکی، 7 تەنەکە زەیت و 2 تەلەفۆنێن دەستی دزینە.
رێخستنا ناڤبۆری هەروها دایە زانین کو چەکداران گەفا کوشتنێ ل وی وەلاتیێ کورد خوارنە ئەگەر گلیێ وان بکە.
ل گۆر هەمان چاڤکانیێ، چەکدارێن فەیلەق ئەل-شام هەروها ب سه‌ر مالا وەلاتی عەلی رفعەت دا ل ل هه‌مان گوندی گرتنه و 600 لیرەیێن ترکی، تەلەفۆنەکە دەستی و چەکەک ژێ دزینە.
هەرێما عه‌فرینێ یا رۆژئاڤایێ کوردستانێ ژ ئادارا 2018ان ڤە د بن کۆنترۆلا ترکیێ و کۆمێن چەکدارێن ئۆپۆزسیۆنا سووریێ یێن گرێدایی ترکیێ دە یە.
ژ وێ دەمێ دە ب سەدان بنپێکاری ژ ئالیێ کۆمێن چەکدار ڤە د دەرهەقێ خەلکێ رەسەنێ هەرێمێ کو کوردن، هاتنە کرن و تەڤی کو سازی و رێخستنێن مافێن مرۆڤانێن جیهانی و هەرێمی چەندین راپۆرت دەربارێ وان بنپێکاریان دە بەلاڤ کرنە، رێ ل بەر وان بنپێکاریێن ل عه‌فرینێ نەهاتیە گرتن.
