هەیا نها ترکیە ل سەر ئارمانجکرنا مەزلووم عەبدی ل سلێمانی بێدەنگە

هەیا نها ترکیە ل سەر ئارمانجکرنا مەزلووم عەبدی ل سلێمانی بێدەنگە

 رێڤەبرێ راگهاندنێ یێ فرۆکەخانەیا ناڤدەولەتی یا سلێمانیێ دانا محەمەد رۆژا 3\4\2023، راگهاند ژ وان رە هاتیە راگهاندن کو هەموو گەشتێن ئاسمانی یێن د نێڤبەرا فرۆکەخانەیا سلێمانیێ و ترکیێ دە، ژ ئالیێ ترکیێ ڤە بێی کو چ راڤەکرنەکێ بدن، هاتنە بەتالکرن. لێ پشت رە مالپەرا میدل ئیست ئای رۆژا 4\4\2023 ل سەر زارێ چەند ژێدەران بەلاڤ کر کو د ناڤبەرا ئیراق و سووریێ دە “پرەکە ئاسمانی” هەیە کو تێ ئیدیعاکرن چەکدارێن په‌كه‌كێ ل سەر داخوازا بافل تالەبانی، هەڤسەرۆکێ یه‌كیتیا نشتیمانی یا کوردستانێ یه‌نه‌كێ تێن ڤه‌گوهه‌ستن و ئه‌شكه‌ره‌ كر ئەڤ رێ پشتی کەتنا دو هەلیکۆپتەرێن مەها بۆری ل ناڤچەیا چەمانکێ یا پارێزگەها دهۆکێ هات ئەشکەرە کرن ب ڤێ سەدەمێ ژی ترکیێ ئاسمانێ خوە ل همبەر گەستێن ژ سلێمانیێ و بۆ سلێمانیێ قەپات کریە.

پشتی راگرتنا گەشتێن ئاسمانی یێن د نێڤبەرا فرۆکەخانەیا سلێمانیێ و ترکیێ دە، رۆژا ئینێ 7ێ نیسانا 2023 تەقینەک ل نێزیکی فرۆکەخانەیا ناڤدەولەتی یا سلێمانیێ روو دا و د ئەنجامێ دە ئاگر ب دەردۆرا فرۆکەخانەیێ کەت. مەدیایا ئیراقێ هەر زوو راگهاندن کو ئێریش ب ریا درۆنێ هاتیە کرن. ئێریش ل دژی فەرماندارێ گشتییێ هێزێن سووریەیا دەمۆکراتیک (هه‌سه‌دێ) مازلووم عەبدی هاتیە کرن و ئەو ژ هەولەکە کوشتنێ رزگار بوویە. لێ ترکیێ ت داخویانیەک فەرمی د ڤێ دەربارێ دە نەدا و بێی دەنگ ما.

کێ فرۆکەخانەیا سلێمانیێ ئارمانج کر؟

هەر دەما ترکیێ ل جیەکێ رێڤەبەرەکی پەکەکێ ئارمانج کربە داخویانیەک فەرمی پارڤە کریە و ئەڤ یەک ئەشکەرە کریە، لێ بەلێ ڤێ جارێ د مژارا فرۆکەخانەیا سلێمانیێ دە بێی دەنگ ما.

 دبە کو مەبەستا ترکیێ کوشتنا مەزلووم عەبدی نەبە و ب تەنێ خوەستبە ئاخافتنا خوە ئیسپات بکە و ژ رایا گشتی رە ئەشکەرە بکە کو ل بالەفرخانەیا سلێمانیێ کارێن نە قانوونێ تێن کرن، ژ بەر ڤێ یەکێ ژی دەما مەزلووم عەبدی ل فرۆکەخانەیا سلێمانیێ درۆنێن ترکیێ نە وەساییتا مەزلووم عەبدی تێدە و نە ژی فرۆکەیا وی دخوەست لێ سووار ببە هەدەف نەگرت، ترکیە باش فێم دکە ئێریشەکە ب ڤی ئاوا د ناڤا فرۆکەخانەیەک سڤیل دە وێ ئەنجامێن پر خەراب ل سەر ئاستا ناڤنەتەوی ژ وێ رە ل پەی خوە بینە، لۆما ب تەنێ ب تەقینەک بچووک کو هەیا نها نایێ زانین ب رێیا درۆنان پێک ئانیە یان ژی ب ئاوایەکی دن و ل سەر ئەردێ ئەڤ چالاکیە ئەنجام دایە ئاخافتنا خوە ئیسپات کر و پشترە خوە بێی دەنگ کر.

ئارمانجگرتنا مەزلووم عەبدی ژ ترکیێ رە ل رۆژئاڤا پر هێسانترە ژ ئارمانجگرتنا وی ل سلێمانیێ، ترکیە دکارە ل رۆژئاڤا مەزلووم عەبدی هەدەف بگرە و وی بکوژە، لێ هەیا نها ئەڤ یەک ئەنجام نەدایە. ئێماژە بۆ ڤێ یەکێ دچن کو ترکیێ ب تەنێ خوەستیە یەنەکێ ژ کارێن وێ هایدار بکە و ژ وان رە راگهینە ئەم هایدارن ل سلێمانیێ چ تێ کرن.

ژ ئالیێ خوە ڤە وەزیرێ دەرڤە یێ ترکیێ مەولود چاڤوشۆغلو ب کانالێ atv یێ ترکیێ رە هەڤپەیڤینەک ئەنجام دا، باس ل کەتنا فرۆکەیێن ل چەمانکێ یا سەر ب باژارێ دوهۆکێ ڤە و هەر وەها گرتنا قادا خوە یا هەوایی ل همبەر سلێمانیێ کر و راگهاند پارتیا تالەبانی فرۆکە ژ فرانسایێ وەرگرتنە و خستنە د خزمەتا پەکەکێ دە و ئەڤ یەک ژی نایێ قەبوولکرن، لێ بەلێ چاڤوشۆغلو ب ت ئاوایی باسی بوویەرا هەدەفگرتنا مەزلووم عەبدی د ناڤا بالافرخانەیا سلێمانیێ دە نەکر.

هەیا نها نە خویایە ب دروستاهی کیژان ئالی بالافرخانەیا سلێمانیێ ئارمانج کر، لێ بەلێ ب ئەشکەرە خویایە کو مەبەست ژ ڤێ چالاکیێ نە کوشتنا مەزلووم عەبدی بوویە، بەلکو ب تەنێ ئەشکەرەکرنا وێ یەکێ بوویە کو مەزلووم عەبدی ل سلێمانیێ یە.

پوستێن ھەمان بەش