قایمەقامێ قەزا شنگالێ راگەھاند، ژ بەر بارینا باران و لەھیێ گەلەک خانیێن خەلکێ شنگالێ ھلوەشیان و رێژەیا وێرانیا شنگالێ ژ سالا 2014ێ ڤە ھەتا ناھا گەلەک زێدە بوویە.
قایمەقەمێ قەزا شنگال نایف سەیدۆ راگەھاند: “ل شنگالێ ئەو خانیێن سالا 2014ێ دا تەرۆریستێن داعشێ ھلنەوەشاندبوون، ژ بەر بارینا باران و رابوونا لەھیێ ھلوەشیان. ژ بەر پرانیا خانیێن خەلکێ شنگالێ ژ ئاخ و ھەڕیێ ھاتنە چێکرن و ئەڤ 8 سالە ڤالا نە و نەھاتنە نووژەن کرن.”
نایف سەیدۆ دیار کر: “ھن گوند ل شنگالێ ھەنە بەشا پرانیا خانیێن وێ وێران بوونە و سال ب سال ژی رێژەیا وێرانیا خانیان زێدە دبە، ژ بەر پرانیا خانیان ب ھەڕی و ئاخێ ھاتنە چێکرن، ژ بەر وێ ژی نکارن خوە راگرن و ھلدوەشن.”
هەر وەها گۆت: “گەلەک سەدەمێن نەڤەگەرا کۆچبەرێن شنگالێ ھەنە، دەرڤەیی خانی ھەڕی نە و ژ بەر بارینا بارانێ ھلوەشیانە، حکوومەتا فەدەرال یا ئیراقێ خەلکێ زیاندیتیێ شنگالێ قەرەبوو نەکریە و خانیێن وان نووژەن نەکرنە.”
ھەروھا ئاشکەرا کر: “هێژ ل ھن جیھ و دەڤەرێن شنگالێ پاشمایێن کارێن تەرۆریستێن داعشێ مانە و مین و تەقەمەنی نەھاتنە پاقژ کرن، مە گەلەک جاران داخواز کرنە ھەموو شنگالێ ل مین و تەقەمەنیێن تەرۆریستان نەھاتنە پاقژ کرن، لێ ھەتا نھا ل ھن جیھا ئەو کار نەھاتنە کرن.”
