سەرۆکوەزیرێ ھەرێما کوردستانێ و میرێ ئێزدیان تەکەزیێ ل سەر گرنگیا جیبجیکرنا رێکەفتنا شنگالێ ژ بۆ ئاساییکرنا و ئاڤەدانکرنا ناڤچەیێ و ڤەگەرا کۆچبەران کرن.
سەرۆکوەزیر مەسروور بارزانی ئیرۆ 16ێ نیسانا 2023ان پێشوازی ل میرێ ئێزدیان میر حازم تەحسین بەگ کر و د وێ ھەڤدیتنێ دە رەوشا ئێزدیان و رەوشا دەڤەرا شنگالێ ب تایبەتی ھات گۆتووبێژکرن.
سەرۆکوەزیر مەسروور بارزانی پشتەڤانیا حکوومەتا ھەرێما کوردستانێ بۆ ماف و داخوازێن ئێزدیان دوبارە کر. ھەر وھا تەکەزی ل سەر گرنگیا جیبجیکرنا رێکەفتنا شنگالێ، دەرکەتنا میلیشیا و گرووپێن چەکدارێن نەیاسایی و ئاساییکرنا دەڤەرێ ژ بۆ ژنووڤەئاڤاکرن و ڤەگەرا کۆچبەران بۆ جھێن خوە کر.
میرێ ئێزدیان سپاسی و پێزانینا خوە ژ بۆ پشتەڤانیا بەردەواما حکوومەتا ھەرێما کوردستانێ بۆ ئێزدیان و کێمکرنا ئێش و ئازارێن وان و گرنگیا رۆلا ئێزدیان د سازیێن حکوومەتێ دە نیشان دا.
