10 سالن، ھەر 8 ئەفسەرێن کورد یێن ژ رێژیما سووریێ جودا بووین بێ چارەنڤیسن، تەڤی کو ل ھەرێمێن د بن دەستێ پارتیا یەکیتیا دەمۆکراتیک پەیەدێ دە ھاتبوون بنچاڤکرن، و د 16 نیسانا 2013 نووچەیێن وان ھاتنە برین، لێ پەیەدێ دان ب ھەبوونا وان ئەفسەران د زندانێن خوە دە، یان ژی رادەستکرنا وان ب رێژیما سووریێ ناکە.
پشتی شۆرەشا سووریێ ژ بەر کو ئارتێشا رێژیما سووریێ ب کارێ ستەمکاری و بنپێکرنان دەرھەقێ گەلێ سووریێ دە رادبوون؛ ب ھەزاران ئەفسەر و چەکدار ژ ئارتێشا رێژیمێ جودا بوون، ھەروھا ب ھەزاران ژ کوردێن کو د لەشکەریا رێژیمێ یا نەچاری دە بوون و کەسێن خوەبەخش ڤەقەتیان.
د مەھا نیسانێ 2013ێ 8 ئەفسەرێن کورد ژ ئارتێشا رێژیمێ جودا بوون، و بریارا ھاتنا ھەرێما کوردستانێ دا، پشتی کو خوە گھاندن باژارێ قامشلۆ یێ رۆژئاڤایێ کوردستانێ کو د وێ دەمێ و تا نھا ژی ئەو باژار د بن دەستێ پەیەدێ دەیە، دەنگووباسێن وان ھاتن برین.
ئەفسەرێن کورد ئەڤن:
عەمید محەمەد خەلیل ژ باژارێ بابێ یێ رۆژھلاتێ حەلەبێ
عەقید محەمەد ھەیسەم ژ باژارێ عەفرینێ
عەقید حەسەن ئۆسۆ ژ باژارێ عەفرینێ
عەقید محەمەد گولە خێری ژ باژارێ عەفرینێ
موقەدەم شەوقی عۆسمان ژ باژارێ عەفرینێ
راد بەھزاد ناسۆ ژ باژارێ عەفرینێ
نەقیب حسێن بەکر ژ باژارێ عەفرینێ
مولازم ئەوەل عەدنان بەرازی ژ باژارێ کۆبانێ
ل گۆر چالاکڤان و سیاسەتمەداران، پەیەدە ب کارێ بنچاڤکرنا ڤان ئەفسەرێن کورد رابوویە و نە دوورە کو پەیەدێ ئەو ئەفسەر رادەستی رێژیمێ کربن.
