د سەر دارڤەکرنا خەباتکارێ رۆژهلاتێ کوردستانێ مستەفا سەلیمی رە 3 سال دەرباس بوون، سەلیمی ژ زیندانا سەقەزا ئیرانێ رەڤیا، هات سلێمانیێ، ژ ئالیێ هێزێن یه‌نه‌كێ ڤە هات گرتن و رادەستی دەولەتا ئیرانێ هات کرن و پشتی 5 رۆژان هات ئیدامکرن.
د دەما بوویەرێ دە ژ بەر بەرتەکێن رایا گشتی، هێزێن یه‌نه‌كێ راگهاندن کو ت زانیاریێن وان دەربارێ بوویەرێ دە نینن. لێ بەلگەیێن پشترە نیشان ددن کو سەلیمی ژ ئالیێ یه‌نه‌كێ ڤە هاتیە رادەستکرن، رێخستنا مافێن مرۆڤان یا هەنگاو بوویەر ئاشكه‌ره کر.
هەر وها رۆژنامەگەر عه‌لی جوانمەردی ژی ب بەلگەیان رادەستکرنا سەلیمی پشتراست کر، هەر وها حکوومەتا هەرێما کوردستانێ ژی راگهاند، کو هایا وان ژ بوویەرێ نینە و پارلامەنتۆیێ ژی شاندەکە خوە ئاڤا کر، لێکۆلین کرن و راپۆرتا داوی بەلاڤ کر.
د راپۆرێ دە چ هەبوو؟
راپۆر ب ئیمزەیا ئەرشەد حوسێن، حکمەت محەمەد، رزگار عیسا سوار، نزار مەلا عەبدولغەفار و محسن حوسێن یێن د کۆمیسیۆنێ دە جهـ گرتنە هاتیە ئامادەکرن.
د راپۆرێ دە تێ گۆتن کو مستەفا سەلیمی ل گەل 6 گرتیێن کو ژ گرتیگەهێ رەڤیانە، بریار دایە دەرباسی هەرێما کوردستانێ ببە، هنەک ژ وان دەرباسی هەرێما کوردستانێ بوونە و هنەکان ژی دەڤ ژێ بەردا و گۆت، «مستەفا سەلیمی گهیشتیە گوندێ سیاگووزە یێ گەرمەکێ یێ ناڤچەیا پێنجوێنێ یا باشوورێ کوردستانێ، سه‌لیمی ل 2/4/2020 ژ کورێ خوە رە پەیامەک شاندبوو و گۆتبوو کو ئه‌و گهیشتیە وێ دەرێ».
د راپۆرتا کۆمیسیۆنێ دە هوورگلیێن کو مستەفا سەلیمی چوویە مزگەفتا گوندێ سییاگووزێ، شەڤا خوە ل ور دەرباس کریە و چەند گوندیان ئەو دیتنە، پشترە کەسەکی ژ گوند ژ بەر مەترسیا ڤیرۆسا کۆرۆنایێ فەرمانا گشتی ئاگاهدار کریە و پشترە هێزێن ئاساییشێ هاتن گوند و مستەفا سەلیمی برن.
د راپۆرێ دە هەر وها ئاگاهی هاتیە کو مستەفا سەلیمی د هەڤدیتنا ب مالباتا خوە رە گۆتیە، ئەو دەرباسی هەرێما کوردستانێ بوویە و ژ ور ژی رادەستی ئیرانێ هاتیە کرن.
مسته‌فا سه‌لیمی پشتی كو هاتیه راده‌ست كرن، ل 11 نیسانا 2020ێ ل زیندانا سه‌قزێ جه‌زایێ دارڤه‌كرنا وی هاتبوو جیبجی كرن.
