په‌كه‌كێ وه‌لاتیه‌كێ هه‌رێما كوردستانێ كوشت
وه‌لاتیه‌كێ هه‌رێما كوردستانێ ل شه‌ڤا ده‌رباسبوویی ب ئاوایه‌كی هۆڤانه ل ناڤچه‌یا كوچه‌رات یا گرێدایی دێركێ ل هه‌رێما جزیرێ یا رۆژئاڤا هات قه‌تل كرن، ئاگاهیێن پشتراستكری هه‌نه كو رێخستنێن په‌كه‌كێ یێن ل رۆژئاڤا ئه‌و قه‌تل كری یه.
چاڤكانیێن پێگه‌ها «داركا مازی» ل رۆژئاڤا كوردستانێ ئه‌شكه‌ره كرن، ل شه‌ڤا ده‌رباسبوویی 25 نیسانا 2023ان، وه‌لاتیه‌كی باشوورێ كوردستانێ یێ ب ناڤێ «ئه‌حمه‌د عومه‌ر عه‌لی ئیبراهیم» ل گوندێ سوێدیا یێن ناڤچه‌یا كۆچه‌رات كو دكه‌ڤه دێركا رۆژئاڤا كوردستانێ، پشتی ل 24 ڤێ مه‌هێ وه‌ندا دبه، جه‌سه‌دێ وی ل شه‌ڤا ده‌رباسبوویی ژ هێلا ئاساییشا په‌یه‌دێ ڤه ل ناڤا زه‌ڤیه‌كه گه‌نم تێ دیتن.
چاڤكانیێن پێگه‌ها مه ئه‌شكه‌ره كر كو «ئه‌حمه‌د عومه‌ر» ل شه‌ڤا 24 نیسانێ ب سه‌ردان دچه مالا جیرانێ خوه یێ ب ناڤێ «ئه‌مین فه‌قه ره‌شید قاسم» كو ئه‌ڤ كه‌س په‌كه‌كه‌یی یه و 3 كوڕێن خوه د ناڤا ره‌فێن ڤێ رێخستنێ ده فه‌داكرنه و ل ور وه‌ندا دبه و رۆژا په‌یره جه‌سه‌دێ وی ل پشتا گوند تێ دیتن.
ئه‌حمه‌د عومه‌ر كی یه و ل رۆژئاڤا چ دكر؟
«ئه‌حمه‌د عومه‌ر عه‌لی ئیبراهیم» وه‌لاتیه‌كێ باشوورێ كوردستانێ یه، ل سالا 1975 ب مالباتا خوه ره ئاواره‌ی رۆژئاڤا كوردستانێ ببوو، پشتره ل سالا 1991 مالباتا وی ڤه‌گه‌ریابوون باشوور لێ ئه‌و ل ور ما، ئه‌و نه‌ڤیێ شه‌هیدی یه، و كۆڕه‌كی وی یێ پێشمه‌رگه ل باشوورێ كوردستانێ هه‌یه.
چاڤكانیێن «داركا مازی» ئه‌شكه‌ره كرن كو 6 مه‌هان به‌رێ كه‌چا محه‌مه‌د یا 14 سال، ژ هێلا چه‌ته‌یێن په‌كه‌كێ «جوانێن شۆره‌شگه‌ر» ڤه هاتبوو ره‌ڤاندن و ژ به‌ر كو وی هه‌ولێن ڤه‌گه‌راندنا كه‌چا خوه دان، راستی ئێریش و گه‌فخوارنێن په‌كه‌كێ هاتبوو.
پشتی بوویه‌را قه‌تلكرنا وی، هێزێن ئاساییشا په‌یه‌دێ هه‌رسێ برایێن وی «مزگین، عه‌لی و محه‌مه‌د» ده‌سته‌سه‌ر كرن، لێ به‌لێ ئیرۆ سه‌ربه‌ست ئازاد كرن.
