وەک تێ زانین د دەما بریارا ھلبژارتنا ھاتی دایین ھەتا ڤێ گاڤێ ھەدەپە د ناڤا گۆتوبێژەکی دە بوو. ھەدەپێ د سەری دە دا خویاکرن کو، ئەو د ناڤا خوە دە ژ بۆ کەشفکرنا بەربژێرەکی یێ سەرۆککۆماریێ دخەبتن. ھەتا شاندا ھەدەپێ سەردانا دەمیرتاش کرن و ژێ رە پێشنیار کر کو ببە بەربژێر. دەمیرتاش قەبوول نەکر و ھەدەپێ ددا خویاکرن کو ئەو دخوازن بەربژێرەک ژن دەستنیشان بکن. لێ ئەڤ ھەموو لەیزتکەک سیاسی بوو.
ژ بەر کو، د سەری دا رۆژا کو بریارا ھلبژارتنا ھاتی دایین قەندیل و جەهەپێ لھەڤکر بوو. موومیکنە ھەڤسەرۆکێن ھەدەپێ ناڤەرۆکا ڤێ لھەڤکرنێ نەزانیبیتن، ژ بەر کو ھەڤسار ب تەمامی د دەستێ قەندلێ دە بوون. ھەتا ئەڤ یەک د ناڤا کوردێن کو پشتگریا ھەدەپێ دکن بوو سەدەمێ نەخوەشییەکی.
ھەتا ڤێ گاڤێ لھەڤھاتنا جەهەپێ و قەندیل نایێ ئەشکەرەکرن و چ جاران ژی نکارن ئەشکەرە بکن. ئەگەر کلچدارۆغلو سەربکەڤە دێ د دەستھلاتا خوە دە جھ بدە ھەدەپێ. لێ دێ ڤێ جارێ نوونەرێن قەندیل د ناڤا دەستھلاتێ دە، دێ نە کوردبن. نوونەرێن قەندیل حەسەن جەمال، جەنگیز چاندار و یێن وەک سری سورەیا بن. واتە دێ کەسایەتێن کەمالیست بن .
ھەدەپێ ب ئاوایەک ئەشکەرە ب رێیا هەڤپەیمانیا کەد و ئازادیێ پشگریا خوە ژ بۆ کلچدارۆغلو ئەشکەرە کر. د داخوویانیێ دە جاردن بەحسا کوردا نەکرن و تفاقا کەد و ئازادیێ دبێژە: وەکە کو تێ زانین، شۆرەشگەر، دەمۆکرات و بندەستێن گەلێن ترکیەیێ ب ناڤێ هەڤپەیمانیا کەد و دەمۆکراسیێ دە ل ھەڤ کۆم بوونە. مە بریار دان کو د ھلبژارتنێن سەرۆککۆماریێ دە کاندیدەکێ نیشان نەدن و د ھلبژارتنێن پارلامەنی دە ژی د بن سیوانا تفاقێ دە تەڤلی ببن. د ڤێ پێڤاژۆیا دیارکەرا سیاسەتا ترکیەیێ دە ھەم ژ بۆ بجھانینا وەزیفەیا خوەیا دیرۆکی، ھەم ژی ژ بۆ پاشەرۆژا نفشێن نوو، مە بریار دان کو بەرپرسیاریا خوە ب جھ بینن. د ڤێ چارچۆڤەیێ دە د ھلبژارتنێن سەرۆککۆماریێ یێن 14 گولانا 2023 دە مە بریار دان کو پشتگریێ بدن کەمال کلچدارۆغلو و ئەم ڤێ بریارا خوە ب رایا گشتی رە پارڤە دکن.
هەڤپەیمانیا کو ژ ھەدەپێ و گروپێن چەپێن ترکان پێکھاتی دبێژە: ئەم بانگ دکن کو د ھلبژارتنێن پارلامەنتەریێ دە دەنگێ خوە بدن تفاقا کەد و ئازادیێ، د ھلبژارتنێن سەرۆکۆماریێ دە ژی دەنگێ خوە بدن کەمال کلچدارۆغلو.
سیاسەتا پەکەکێ دیارە، پەکەکە ژ نھاڤە د مەدیا خوە دە، ژ بۆ ھلبژارتنا شەرێ پەدەکێ دکە. رۆژانە د مەدیا خوە دە پەدەکێ ب پشتگریا “فاشیستان” ئیتیھام دکە.
د وەشانا فەرمی یا پەکەکێ «لێکۆلین» دە رۆژانە نڤیسێن ل سەر دەرەوان ھاتین ئاڤاکرن تێنە نڤیساندن و پەدەکێ ب ھەڤالتیا ئاکەپێ تاوانبار دکن. د نڤیسەکی دە کو د لێکۆلنێ دە ھاتی وەشاندن دە دبێژە:
” چما پەدەکە د ڤان ھلبژارتنان دە ژی وەکە بەرێ تەڤدگەرە و ھەلوەستا خوە ددە خویاکرن؟ نڤیسکار، وێنەساز، ئالیگر و ھندەک بورۆکراتێن وێ ڤێ یەکێ پر ڤەکری، بێ شەرم باس دکن. نیک دلەکی ھەلوەستەکە کوردەواری وەردگرن و ھەدەپێ وەک پارتیەکە ترکپەرەست ب ناڤ دکن. هەڤپەیمانیا پەدەکێ-ئاکەپێ، ھەڤکاری، شریکاتی، تو چ ببێژی، تێ زانین. رەوشەکە نوو نینە. بەرێ ژی پەدەکێ ب گەلەک ئاوایان ب تایبەت ل باکورێ کوردستانێ دەستەکەکە مەزن دابوو دەستھلاتداریا فاشیستا ئاکەپێ-مەھەپێ و ژ بۆ ڤێ ژی خەبات دکر. هەڤپەیمانی و ھەڤکاریا پەدەکێ-ئاکەپێ نە تەنێ ل دژی گەریلایێن ل باشوورێ کوردستانێیە، ل دژی ھەر کەسێ کو ل دژی ئاکەپێ بە یە.”
پەکەکە ژ بۆ پاراستنا دەولەتا کوورا ترکا ڤەشێرە دڤێت ئێریشێ پەدەکێ بکە. پەدەکێ چ پێوەندیەکا راستەراست ب ھلبژارتنێن ترکیێ و کوردستانا باکور ڤە نینە. لێ گەلەک وەلات و دەولەت ل ھمبەر ھلبژارتنێن ترکیێ دیتنێن خوە دبێژن. دەستھلاتا باشوورێ کوردستانێ خوەدی دۆست و ھاڤالانە، ھەر دەمی ئەو رێبازا کوردایاتییێ رێڤە دبن و تشتا کو بەرژەوەندیا گەلێن کوردستانێ دە بە و ھەروەھا تشتا کو دەستکەفتیێن کوردستانی بپارێزە دکن.
پەکەکە ب ھەموو ئاوایی وەک سیخوورێ دەولەتێن داگیرکەر دژمناتیا دەستھلاتا باشوورێ کوردستانێ دکە و “گەریلایێن” خوە ھەموو وەکە گەفەکێ ل دژێ دەستھلاتا باشوور تەڤدگەرینە.
لێ نھا ژی ھەڤکاریا خوەیا ل گەل جەهەپێ و هەڤپەیمانیا ملەت ڤەدشێرە و ژ بۆ ڤێ ژی ھەر تشتەکی دکە. بەربژێرن جەهەپێ ڤەکری دبێژن، دێ پەکەکە دەست ژ چەکان بەردە، ئەم دێ دەمۆکراسیەک نوو ئاڤابکن و بەحسا “ئاشتیێ” دکن.
پەکەکە بەر ب تێکچوونەکێ ڤە دچە، ئێدی نە کلچدارۆغلو و نە ژی IYI پارتی نکارە پەکەکێ ژ تێچکوونێ خلاس بکە. پەکەکێ ڤەکری ل سەر مێزەیا 6 قۆلی دە وەک ئالیێ حەفتەمین جھ گرتیە. لێ ژ بۆ سیاسەتا بێ شەخسیەت نکارن ڤێ یەکێ ئەشکەرە بکن. ژ بۆ پیسیتیا خوە ڤەشێرن ئێریشێ پەدەکێ دکن.
رۆژەڤاکورد
