سەرۆکۆمارێ ترکیێ رەجەپ تاییپ ئەردۆگان کوشتنا سەرکردەیێ داعشێ د ئۆپەراسیۆنەکە میتێ دە ل عه‌فرینێ رادگهینە.
سەرۆکۆمارێ ترکیێ شەڤا بۆری د بەرنامەیەکە تەلەڤیزیۆنی دە ئەشکەرە کر، دەزگەها هاوالگیری یا ترکیێ میتێ سەرکردەیێ داعشێ ئەبو حسێن ئەل-قورشی کو ئەڤ دەمەکە چاڤدێریا وی دکر، ل سووریێ د ئۆپەراسیۆنەکێ دە کوشتیە.
ئەبو حسێن ئەل-قورەشی، سەرکردەیێ چارەمینێ داعشێ یە و ژ 30ێ مژدارا سالا 2022ان ڤە ئەڤ پۆست وەرگرتیە.
رەوانگەها سووری یا مافێن مرۆڤان دوهی 30ی نیسانا 2023ان راگهاندبوو، باراگەهەکە لەشکەری یا گرووپا ب ناڤێ «جەیش ئەل-شەرقیێ» ل دەردۆرا گوندێ مسکێ یێ ل ناڤچەیا جندرێسێ یا عه‌فرینێ ب مووشەکەکێ هات ئارمانجکرن و د ئەنجامێ دە کەسەک هات کوشتن، کو تێ تەخمینکرن، ئەو سەرکردەیەکی داعشێ بە.
رەوانگەهێ ئاماژە ب وێ کر ژی، د هەمان دەما ئارمانجکرنا وێ بارەگەها لەشکەری دە، فرۆکەیێن بایراکتار یێن ترکیێ ل سەر وێ دەڤەرێ دفریان، هەڤدەم ژی هێزێن ترکیێ و کۆمێن چەکدارێن سەر ب وێ ڤە، رێیێن کو دچن جهێ بوویەرێ گرتن.
د ناڤینا مەها نیسانا بۆری دە ژی، فەرمانداریا ناڤەندی یا ئامەریکایێ (CENTCOM) د داخویانیا نڤیسکی دە راگهاندبوو، هێزێن وان سەرکردە و پلانسازێ ئۆپەراسیۆنێن داعشێ ل رۆژهلاتا ناڤین و ئەورۆپایێ عەبدولهادی مەحموود ئەل-حاجی عەلی کوشتن.
ژ دەما ژناڤبرنا داعشێ د سالا 2019ان دە، هێزێن ئامەریکی و هەڤپەیمانیا ناڤدەولەتی یا ب سەرۆکاتیا واشنگتۆنێ ل دوو رێبەرێن وێ رێخستنێ دگەرن و د ئۆپەراسیۆنێن تایبەت دە دکن ئارمانج و ب تایبەت ل ناڤچەیێن باکورێ سووریێ یێن د بن کۆنترۆلا چەکدارێن ئۆپۆزیسیۆنا سووریێ دە.
ژ ناڤا وان ئۆپەراسیۆنان، کوشتنا رێبەرێ داعشێ ئەبوو بەکر ئەل-بەغدادی د جۆتمەها 2019ان دە و پشترە ئەبو ئیبراهیم ئەل-قورشی ژی د سباتا 2022ان دە ل پارێزگەها ئدلبێ.
