رێخستنا ستەنبۆلێ یا پارتیا سۆسیالیستا کوردستانێ (پەسەکێ) ب ئالا کوردستانێ بەشداری قادا 1ێ گولانێ بوو.
ئەندامێن پارتیا سۆسیالیستا کوردستانێ (پەسەکێ) ل قادێ بەلاڤۆکێن خوە بەلاڤ کرن.
پەسەکێ ب داخویانیەکێ ئەشکەرە کر: “ل قادا 1ێ گولانێ ئەلەقەیەک مەزن ژ بۆ ئالا کوردستانێ ھەبوو. ب تایبەتی ژ ئالیێ جوانێن کوردێن وەلاتپارێز ڤە ھاتە پێشوازیکرن. لێ ئاژاوەگێرێن نژادپەرەست ژ بەر ئەلەقەیا زێدەیا ل سەر ئالا کوردستانێ قەھرین، بەرتەک نیشان دان و خوەستن ئەندام و رێڤەبرێن پەسەکێ ئیستیفزاز بکن. لێ ئەندامێن پەسەکێ ب تەڤگەر و ھەلوەستا خوەیا ب ئاقلانە ئەڤ پرۆڤۆکاسیۆنا ل دژ پەسەکێ پووچ کرن.”
د داخویانیێ دە ھات دیارکرن: “پۆلیسێن ترک سەرۆکێ پەسەکێ یێ شاخا ستەنبۆلێ مەنسور کارا، ئەندامێ رێڤەبەرییا ناڤەندی بەهائەدین توران و ئەندامێ مەجلسا پارتیا پەسەکێ یەعقوب توران ژ بۆ کو لگەل وان ھەڤدیتنێ پێک بینن گازی ناڤەندا پۆلیسێ کرن. پۆلێسان دەمەکی سەرۆکێ پەسەکێ یێ شاخا ستەنبۆلێ مەنسوور کارا و ھەڤالێن وی ل ناڤەندا پۆلێسان دانە راوەستاندنێ.”
ھات ئەشکەرەکرن: “د ئەنجاما دانووستاندنان دە ئالایێن کوردستانێ ھاتن دەستەسەرکرن. پشتی دەمەکێ پۆلێسان رێڤەبر و ئەندامێن پەسەکێ یێن ژ ئالیێ پۆلێسان ڤە ھاتبوون گرتن سەربەست بەردان. ئەم ڤێ دژمنییا ل دژی پەسەکێ و ڤان کریارێن ئەنتی دەمۆکراتیک، نەھەق و بێ ھقووق ب توندی پرۆتەستۆ و شەرمەزار دکن.”
