فه‌رمانداره‌كێ گرنگ یێ په‌كه‌كێ ل گاره‌ی هاته كوشتن
فه‌رمانداره‌كێ دی یێ هێزا تایبه‌ت یا په‌كه‌كێ ل چیایێ گاره‌ی د ئۆپه‌راسیۆنه‌كه ئیستخباراتا تركیێ دا هاته كوشتن، ئه‌ڤه ژی دبیته فه‌رماندارێ سێیه‌مین كو تركیه د ده‌ما حه‌فتیه‌كێ دا كوشتنا وان رادگه‌هینیت و په‌كه‌كێ ژی ده‌ربارێ وان ته‌نێ گۆتیه: «تركیه ده‌ره‌وان دكه» و هه‌و.
ئاژانسا ئه‌نادۆلێ یا ده‌وله‌تا تركیێ دوهـ رۆژا ئێكشه‌مبیێ 7/5/2023ێ ئاشكه‌را كر كو به‌رپرسێ ئه‌نییا هێزا تایبه‌ت یا په‌كه‌كێ «ئه‌یڤاز به‌یازێ» ب كۆدناڤێ «زه‌رده‌شت كاراده‌نیز» د ئۆپه‌راسیۆنه‌كا ئیستخباراتێ میتێ دا هاتیه كوشتن.
زه‌رده‌شت كاراده‌نیز د سالا 1994ێ دا ته‌ڤلی په‌كه‌كێ بوویه.
ل گۆری ئه‌نادۆلێ، زه‌رده‌شت كاراده‌نیز ب لیستا ره‌نگ سۆر یا ئنتەرپۆلێ و لیستا گه‌ورۆ یا وه‌زاره‌تا ناڤخوه یا تركیێ لێگه‌ریان ل سه‌ر وی هه‌یه.
هات گۆتن کو زه‌رده‌شت كاراده‌نیز ل ده‌ڤه‌را زاپێ یا ل باشوورێ كوردستانێ د ئه‌ركا به‌رپرسیاریێ دا بوو.
میتێ د 4ێ گولانێ دا ل چیایێ گارێ كوشتنا ئاهمەت گوموشێ بەرپرسێ مه‌شقا هێزێن په‌كه‌كێ و د 5ێ گولانێ دا ژی نێچیرڤان سەڤەنوو بەرپرسێ هێزا لۆژیستیک یا تایبەت راگه‌هاندبوو و دوهـ 7ی گولانێ كوشتنا به‌رپرسێ هێزا تایبه‌ت زه‌رده‌شت كاراده‌نیز راگه‌هاندبوو.
