رێڤه‌به‌رییا خوه‌سه‌ر: بێ نان ژیان دبه، بێ ئاپۆ ژیان نابه!!
رێڤه‌به‌رییا خوه‌سه‌ر و پارتییا یه‌كێتییا ده‌مۆكراتیك، دوهـ مه‌شه‌ك ل قامشلۆ ژ بۆی ئۆجه‌لان ساز كر و ل ژێر گه‌فخوارنا قوتكرنا نانی و غازێ، وه‌لاتی ته‌ڤلی مه‌شێ كرن و به‌رێ وان دان ستادیۆما باژار.
رێڤه‌به‌رییا خوه‌سه‌ر و په‌یه‌ده، باسكێن په‌كه‌كێ یێن رۆژئاڤا كوردستانێ، دوهـ رۆژا چارشه‌می 10/5/2023 مه‌شه‌ك ل ژێر ده‌ره‌وا ب ناڤێ «راكرنا ته‌جریدا ل سه‌ر عه‌بدوللا ئۆجه‌لان» ل باژارێ قامشلۆ یێ رۆژئاڤا كوردستانێ، ل دارخست و ب دارێ زۆرێ و ل ژێر ته‌هدیدا بڕینا به‌هرا نانی و غازێ ب سه‌دان وه‌لاتیێن باژار ته‌ڤلی مه‌شێ بوون.
چاڤكانیێن «داركا مازی» یێن ل رۆژئاڤا كوردستانێ، كارین نامه‌یێن ده‌نگی یێن كادرۆیێن په‌یه‌دێ و كارمه‌ندێن رێڤه‌به‌رییا خوه‌سه‌ر ده‌ست خوه بخن كو ب رییا «واتسئاپێ» بۆ وه‌لاتیێن قامشلۆ شاندنه و تێ ده ئه‌و وه‌لاتی تێن ته‌هدید كرن كو گه‌ر رۆژا چارشه‌می 10/5 ته‌ڤلی مه‌شا ژ بۆی ئۆجه‌لان نه‌بن، وێ به‌هرا وان یا نانی و غازێ ژ وان وه‌ره قوت كرن.
هه‌ر وها ده‌ستنیشان كر كو نامه‌یێن ده‌نگی ژ په‌یه‌دێ و رێڤه‌به‌رییا خوه‌سه‌ر ژ بۆی سه‌دان مالباتێن قامشلۆ هاتنه شاندن و ئه‌و ژ نه‌چاری و ترسا قوتكرنا به‌هرا خوه یا نان ته‌ڤلی مه‌شێ بوونه.
په‌یه‌دێ وێنه‌یێن زلامێ ئیمرالیێ خستنه د ده‌ستێن وان ده و درویشما «بێ ئاپۆ بێ سه‌رۆك ژیان نابه» دانه گوتن.
رێخستنا په‌كه‌كێ، 24 ساله ل ژێر ده‌ره‌وا ب ناڤێ «راكرنا ته‌جریدا ل سه‌ر ئاپۆ» گه‌لێ كورد د خاپینه و ووسا دده خوه‌یا كرن كو رێبه‌رێ وان ل ئیمرالیێ ل ژێر ئیشكه‌نجه‌یێ یه، لێبه‌لێ ئۆجه‌لان ل سالا 1999ان ب كێفا دلێ خوه ڤه‌گه‌ری تركیێ و هێژان د بالافرێ ده بوو وه‌ختا ژ ئه‌فسه‌رێن میتێ ره گۆتی: «ئه‌ز ئاماده‌مه خزمه‌تێ بكم، دییا من تركه»!.
عه‌بدوللا ئۆجالان، ژ سالا 1999ێ ڤه وه‌كه میر و سولتانان د ئیمرالیێ ده رازایه و ژ ور رێخستنا خوه ل دژی كوردستانێ ئه‌ركدار كری یه و ت تشته‌كی ب ناڤێ ئیشكه‌نجه و ته‌جرید ل سه‌ر وی تونه.
