ھێزێن سووریا دەمۆکراتیک زارۆکەکا دن ژ باژارێ رەقایێ رەڤاند

ھێزێن سووریا دەمۆکراتیک زارۆکەکا دن ژ باژارێ رەقایێ رەڤاند

دوهی رۆژا چارشەمبێ 10 گولانا 2023 تۆرا راوەنگەھا سووریێ بۆ مافێ مرۆڤان راگهاند کو ئەندامێن ھێزێن سووریا دەمۆکراتیک (ھەسەدێ) زارۆکەک ل باژارێ رەقایێ ل باکورێ سووریێ رەڤاندیە داکو ب دارێ زۆرێ وێ بکن لەشکەر.

 تۆرا راوەنگەھا سووریێ بۆ مافێ مرۆڤان د داخویانیا خوە دە ئەشکەرە کر کو ئەندامێن “ھەسەدێ” کەچا 16 سالی یا ب ناڤێ (وفاء زياب ئەحمەد ئەل-عەجيل)، ژ باژارێ رەقایێ رەڤاندیە و ب دارێ زۆرێ ئەو بریە کامپێن لەشکەرکرنا زارۆکان.

هەر وەها تەکەز کر، “ھەسەدە” ھینا ژی بنپێکرنێن خوەیێن ل دژی سڤیل و زارۆکان بەردەوام دکە، و زارۆکان دگرە و درەڤینە، وان دگھینە کامپێن تەجنیدکرنێ.

رێخستنێ دیار کر کو ئەڤ کەچە هاتیە برن ژ بۆ ھەرێما ئەل-ھەبایا ل گوندەوارێ باکورێ رەقایێ.

هەسەدێ بەریا نھا زارۆکەکی کورد ژ باژارێ کۆبانێ یێ رۆژئاڤایێ کوردستانێ ژی رەڤاندبوو، باڤی زارۆکی پارێزەرە د رێڤەبەریا پەیەدێ دە.

تۆرێ بانگ ل جڤاکا ناڤدەولەتی و رێخستنێن مافێن زارۆکان کر کو ئەرکێن خوە ب جھ بینن، زارۆکان بپارێزن، و فشارێ ل سەر “هەسەدێ” بکن ژ بۆ راوەستاندنا رەڤاندنا زارۆکان و نەھێلانا وان د شەرێن لەشکەری دە، و تەکەزی ل سەر پێویستیا ڤەگەرا ھەموو زارۆکێن رەڤاندی کر ژ مالباتێن وان رە.

ژ دەما کو پەیەدێ دەستهەلاتداری ل رۆژئاڤایێ کوردستانێ ژ رێژیما سووریێ وەرگرتیە، بەردەوام زارۆکان درەڤینە دا کو تەڤلی شەرێن خوەیێن ب برێکاری ل شوونا رێژیما ئەسەد دە بکن، هەسەدێ تا نھا 11 ھەزار ژ جوان کوردان د شەرێن باژارێن عەرەبی دە کرنە قوربانی.

پوستێن ھەمان بەش