ھەڤسەرۆکێ گشتی یێ ھەدەپێ میتھات سانجار ئەنجامێن ھلبژارتنێ نرخاندن و گۆت، “راستە دەنگێن مە کێم بوونە. ب تایبەتی ل ھەرێمێن رۆژئاڤا ئەڤ کێمبوون بالکێشترە. شکەستنەک ھەیە.”
بەردەڤکێن پارتیا چەپا کەسک چیگدەم کلچگون ئوچار و ئیبراھیم ئاکن و ھەڤسەرۆکێن گشتی یێن ھەدەپێ پەرڤین بولدان و میتھات سانجار، تێکلداری ئەنجامێن ھلبژارتنا سەرۆککۆماریێ و ھلبژارتنا گشتییا 14 گولانێ ل ناڤەندا گشتی یا ھەدەپێ داخویانی دان.
میتھات سانجار د نرخاندنا ئەنجامێن ھلبژارتنێ دە دیار کر کو ئەو ژ ئارمانجێن خوە پاشدە مانە و گۆت: “دبە کو سەدەمێن ڤێ وندابوونا دەنگان، جودا بن.”
میتھات سانجار گۆت: “ئەمێ ھەم ل سازیێن خوە و ھەم ژی ل گەل ھەڤکارێن خوەیێن تفاقێ روونن و ڤێ یەکێ بنرخینن. راستە، دەنگێن مە کێم بوونە. ب تایبەتی ژی ل باژارێن رۆژئاڤایێ ترکیەیێ دەنگێن مە ب ئاوایەکێ دیار کێم بوونە. ئەڤە ژ بۆ مە پرسگرێکە. ئەشکەرەیە کو مە د ھلبژارتنێ دە شکەستن ئانیە. ژ بۆ بدەستخستنا کورسیێن زێدەتر ئەم نەگھشتن ئارمانجێن خوە. ئەم دێ گۆتووبێژێ ل سەر کێماسیێن خوە بکن و خوە رەخنە بکن. ئەم دێ سەدەمان نیقاش بکن. د پێڤاژۆیا خوەرەخنەکرنێ دە ئەم دێ کێماسیێن خوە بنرخینن.”
ل گۆری سالا 2018 کێمبوونەک ھەیە
سانجار گۆت: “دەما کو ھەموو داتا زەلال ببن، ئەم دێ ب ئاوایەکی راستتر ببێژن کو وندابوونا دەنگێ مە چقاسە. نھا رێژەیا دەنگێن کو مە ب پارتیا چەپا کەسک وەرگرتیە، ژ سەدی 9.33 خویا دکە. ل گۆری سالا 2018 کێمبوون ھەیە.
گۆت ژی: “د ھەژمارا پارلامەنتەران دە ژی کێمبوون ھەیە، لێ ئەڤ نە کێمبوونەکە دراماتیکە. ئەم د مەجلیسێ دە وەکی سێیەمین کۆما ھەری مەزن بەردەوام دکن. ئیترازێن مە ھەنە، ئەم دێ ببینن کو ئەڤ ئیتیراز دێ چاوا دەرکەڤە. پشتی کو ھەموو دانەیێن یەسەکێ بێن ئەشکەرەکرن ئیحتمال ھەیە کو ھەژمارا پارلەمانتەرێن مە زێدە ببن، لێ دیارە کو ئەم ل شوون ئارمانجێن کو مە دانە بەر خوە مانە.”
سانجار بال کشاندە سەر وێ یەکێ، “ئەم جارەکە دن ببێژن کو ئەڤ یەک وێ د ھەموو ئالیان دە د سازیێن مە دە بێ نیقاشکرن. دبە کو سەدەمێن جودایێن ڤێ وندابوونا دەنگان ھەبن. ئەڤ نە ھنجەتە، لێ تێ زانین کو ئەم د بن شەرت و مەرجێن دژوار دە کەتن ھلبژارتنێ. دۆزا گرتنێ د سێوراندنا پێڤاژۆیا ھلبژارتنێ دە فاکتۆرەک گرینگ بوو. د کەتنا ھلبژارتنان دە ب چەپا کەسک رە ژی ئاستەنگی ھەبوون.”
بریارەکە ستراتەژیک
دەربارێ ھلبژارتنێن سەرۆکۆماریێ دە ژی ھەڤسەرۆکا گشتییا ھەدەپێ گۆت، “مە بریارەکە ستراتەژیک دەربارێ ھلبژارتنێن سەرۆککۆماریێ دە گرت. ئەم دبینن کو ئەڤ بریار ژ ئالیێ ھلبژێرێن مە ڤە ھاتیە قەبوولکرن و بجھانین. ئەڤ بریارا مە فاکتۆرا ھەری گرینگ بوو کو د گەرا یەکەم دە ھلبژارتنا سەرۆککۆماریێ ب کێری تفاقا ملەت دەرنەکەت. گەرا دویەم ل پێشە و پابەندبوونا دەنگدەرێن مە ب بریارێن سیاسی یێن پارتیێ، بوویە فاکتۆرا دیارکەر د ڤێ یەکێ دە.”
