حه‌فت وەلاتیێن کورد ل رۆژهلاتێ کوردستانێ ژ بەر بەشدارییا د خوەپێشاندانێن سالا رابووری پشتی بوویەرا جانژدەستدانا ژینا ئەمینی دە جەزایێ گرتیگەهێ و لێدانا قامچیان ل وان هات برین.
ل گۆر چاڤکانیێن ناڤخوە یێن رۆژهلاتێ کوردستانێ، ئەو 7 وەلاتیێن کورد خەلکێ باژارێ پیرانشارێ ل پارێزگەها ئورمیێ نە و د خوەپێشاندانێن سالا رابووری دە هاتنە گرتن.
ل گۆر رێخستنا هەنگاوێ بۆ مافێن مرۆڤان، ئەو 7 وەلاتیێن کورد ژ ئالیێ دەستهلاتا ئیرانێ ڤە ب «تێکدانا ئەولەهیا گشتی یا دەولەتێ، دەرباسکرنا سینۆران ب ئاوایەکی نە قانوونی، چێکرنا کۆکتۆل مۆلۆتفان، چێکرنا چەکان و هلگرتنا فیشەکان ل جەم خوە» هاتنە تۆهمەتبار کرن.
هاتیە راگهاندن کو دادگەها تاوانان یا پیرانشارێ ب گشتی «جەزایێ 15 سال زیندانێ، لێدانا 160 قامچیان و دایینا هن پەرەیان» ل وان 7 کەسان بڕیە.
تەها رەسوولیان، سینا دەشمیر، ئەحمەد عەبدوڵاهپوور، موحسن قادری، چیا شەهید ئەقدەم، عەبدوڵاهـ قەنبەریوەند و مەحموود قەنبەریوەند دەستپێکا زڤستانا سالا 2022ێ هاتبوون دەستەسەر کرن و پاشێ ب مەرج و ب دانینە رەهینەیێ ب ئاوایەکی دەمکی هاتبوون بەردان.
ل گۆر رێخستنێن مافێن مرۆڤان، عەبدوڵاهـ قەنبەریوەند و مەحموود قەنبەریوەند خوەدی پێویستیێن تایبەتن و تەها رەسوولیان ژی چالاکڤانەکی سڤیل و هونەرمەندە.
