شاندەکە لەشکەری یا ئیراقێ 4 پێشنیار پێشکێشی رایەدارێن کامپا مەخموورێ کرن
شاندەکە وەزارەتا ناڤخوە و بەرەڤانیێ یا ئیراقێ سەردانا کامپا مەخموورێ کر و 4 پێشنیار پێشکێشی بەرپرسێن کامپێ کرن و 3 دەمژمێر دەم دا وان کو بەرسڤا وان بدن و ل بەر کامپێ خوەپێشاندانەک هات لدارخستن.
جیگرێ بەرپرسێ بارەگەها 20 یا یەکیتیا نشتمانیا کوردستانێ (ینک) ل قەرەچۆخێ رەشاد گالالی ئیرۆ شەمیێ ژ رووداوێ رە گۆت، کامپ ژ ئالیێ ئارتێشا ئیراقێ و هێزێن ئەولەهیێ ڤە نەهاتیە دۆرپێچکرن.
رەشاد گالالی دا زانین کو شاندێ 4 داخوازی پێشکێشی رایەدارێن کامپێ کرنە. یا یەکەم، دڤێ کامپ ژ هێلا ئارتێش و پۆلیس ڤە ژ هێلا حكوومه‌تا ئیراقی ڤە وەرە تێلبه‌ند كرن و پاراستن؛ یا دویەمین ژی بەتۆن ل سەر رێ و ل بەر کامپێ بێ دانین؛ یا سێیەمین، دڤێ پۆلیسێن هەرێمی ڤەگەرن کامپێ؛ چارەم، دڤێ یه‌ك رێیه‌كا ب ته‌نێ ژ بۆ هاتنوچووینا نیشتەجهێن کامپێ هەبە.
جیگرێ بەرپرسێ بارەگەها 20 یا رێخستنا قەرەچۆخا یه‌نه‌كێ راگهاند، جڤین ب داوی هات و 3 سائەت دەم ژ بەرپرسێن کامپێ رە هات دایین کو بەرسڤا وان بدن.
ئەڤ کامپ د سالا 1998ان دە ل قونتارا چیایێ قەرەچۆخێ یا رۆژهلاتێ مەخموورێ هاتیە ئاڤاکرن.
ل گۆری رێڤەبەریا مەخموورێ نێزی 10 هەزار کەس د کامپێ دە دژین. ترکیە دبێژە، ئەو کامپ بوویە ناڤەندەکە پەروەردەکرنا ئەندامێن په‌كه‌كێ و هەتا نها چەند جاران ئەو کامپ بۆمبەباران کریە.
