پارلامەنتەرێ پارلامەنتۆیا ئیراقێ ماجد شنگالی راگھاند، رێکەفتنا شنگالێ بەر ب ئالیەکی دن ڤە دچە و حەشدا شەعبی رێ نادە رێکەفتنا شنگالێ بهێت جێبەجێکرن.
شێورمەندێ ئاسایشا نشتمانی یا ئیراقێ قاسم ئەل-ئەعرەجی رادگھینە، حکوومەتا ئیراقێ پابەندی رێکەفتنا شنگالێ یە و گۆت: “ل شنگالێ چەکدارێن نە یاسایی ھەنە کو ل دژی رێکەفتنێ نە. ئەم پابەندن ب ڤەکشینا ھەموو ھێزان ژ شنگالێ، ژ بلی پۆلیس و ئارتێشێ.”
د ڤێ دەربارێ دە پارلامەنتەرێ پارلامەنتۆیا ئیراقێ مەجید شنگالی راگهاند: “قاسم ئەل-ئەعرەجی کەسەکی پر ئەرێنی یە. ئەز باوەر ناکم رێکەفتن د ھەفتەیەکێ دە بهێت جێبەجێکرن. حەشدا شەعبی نھا ھەولا ئاڤاکرنا دو لیوایێن دن ددە.”
ماجد شنگالی ئانی زمان، گەلەک دەولەت دەستێوەردانێ د مژارا شنگالێ دە دکن و ئیران ژی پشتگریا مانا پەکەکێ و یەپەشێ ل شنگالێ دکە. ئیران دخوازە کو “ھیلالا شیعە” ل دیالا، کەرکووک، نەینەوا، شنگال و سووریێ بمینە.
ماجد شنگالی گۆت: “ھێزێن پەکەکێ ب ئالیکاریا حەشدا شەعبی، یەنەکێ و ئیرانێ دخوازن پارتیا دەمۆکراتا کوردستانێ ژ شنگالێ دەرکەڤە. لێ بەلێ ئەڤ ھەموو نکارن ڤێ یەکێ بکن، ژ بەر کو گەلێ شنگالێ پشتگریا پەدەکێ دکە.”
وی ئەندامێ پارلامەنتۆیا ئیراقێ گۆت، دڤێت سەرۆکوەزیرێ ئیراقێ محەمەد شیاع سوودانی د زووترین دەم دە پرسا شنگالێ چارەسەر بکە و رێکەفتنا شنگالێ جێبەجێ بکە.
