ئەئەکەسە: پەیەدە ژ گرتنا دەریێ سینۆری بەرپرسە

ئەئەکەسە: پەیەدە ژ گرتنا دەریێ سینۆری بەرپرسە

ئەنجوومەنا نشتمانییا کوردی ل سووریێ (ئەنەکەسە) رادگھینە، پەیەدە ژ گرتنا دەریێ سینۆرییێ د ناڤبەرا رۆژئاڤایێ کوردستانێ و ھەرێما کوردستانێ بەرپرسە.

ئەمینداریا گشتییا ئەنەکەسێ ئیرۆ د داخویانیەکێ دە راگھاند، پەیەدە دەریێ سینۆری سێمالکا ژ بۆ بەرژەوەندیێن خوەیێن سیاسی و بەرووڤاژی بەرژەوەندیێن گەل ب کار تینە و ئەو د بەر گرتنا ڤی دەرگەھی دە بەرپرسە.

ئەنەکەسێ داخواز ژ ئامەریکا و ئالیێن پەیوەندیدار کر کو ب ئەرک و بەرپرسیارەتیا خوە د ڤێ دەربارێ دە رابن.

ئەنەکەسێ د داخویانیا خوە دە بەحسا ڤەگەرا سووریێ بۆ ناڤا کۆمکارا عەرەبی و ئاساییکرنا پێوەندیان کر و راگھاند، بریارا دەولەتێن عەرەبی دێ بھێلە کو رژیم ئاستەنگیان ل پێش ھەولێن سیاسی بۆ جێبەجێکرنا بریارا ناڤدەولەتی 2254 زێدە بکە.

ئەنجوومەنا نشتمانییا کوردی ل سووریێ (ئەنەکەسێ) تەکەز کر، ب تەنێ بریارێن ناڤدەولەتی کریزا سووریێ چارەسەر دکن.

ئەنەکەسێ دەستنیشان کر ژی، ژ بۆ ئاڤاکرنا سووریەیەکا دەمۆکراتیک، پرئالی و فەدەرال، دڤێت د دەستوورەکە نوو دە ئازادیێن بنگەھین و دەمۆکراسیا ھەموویان بێن گارانتی کرن و مافێن نەتەوییێن گەلێ کورد و ھەموو پێکھاتەیێن سووریێ بێ ناس کرن.

د جڤینێ دە ئەنەکەسێ رەوشا عەفرینێ نرخاند و تەکەزی ل سەر وێ یەکێ کر کو پێویستە ئیتیلافا ئۆپۆزیسیۆنا سووریێ و حکوومەتا دەمکی پابەندی سۆزێن خوەیێن دەربارێ کۆمکوژیا جەندرێسێ د شەڤا نەورۆزێ دە ببن، تاوانبار بهێن سزادان و باندۆرێن وێ بهێن چارەسەرکرن و چەکدار ژ دەڤەرێن نشتەجھبوونێ بێن دەرخستن، و شەرت و مەرجێن ئەولە ژ بۆ ڤەگەرا کۆچبەران بۆ مالێن خوە بهێن پەیداکرن.

پوستێن ھەمان بەش