ھێزێن ئەولەھیا ئیرانێ دوھ ب شەڤ ل سینۆرێ «ھەنگەژالە» یا سەر ب باژارێ بانەیا رۆژھلاتێ کوردستانێ گولـلە ل کۆلبەرێن کورد بەردان و کۆلبەرەک بریندار بوو. ھەروھا چەند رۆژان بەری نھا ژی ل سینۆرێ «نەوسوود» ژی ھێزێن ئەولەھیا ئیرانێ گولـلە ل کۆلبەران بەردابوون و 2 کۆلبەر ژی ل وێ دەرێ بریندار ببوون.
ل گۆر راپۆرتا رێخستنا مافێ مرۆڤان یا ھەنگاو دوھ 24/5/2023یێ ب شەڤ دەمژمێر 22:30 ھێزێن ئەولەھیا ئیرانێ ل سینۆرێ «ھەنگەژالە» یا سەر ب بانە گولـلە ل کۆلبەران بەردانە و د ئەنجامێ دە کۆلبەرەکی ب ناڤێ «سۆران کەریم» کو خەلکێ گوندێ «خۆریاوا» یا سەر ب باژارێ بانەیە بریندار بوو.
ھەنگاو راگەھاندیە، برینا وی کۆلبەری گرانە و ل نەخواشخانەیا سەلاحەدین ئەیوبی یا باژارێ بانە د بن چاڤدێریا بژیشکی دەیە.
ژ ئالیێ دن ڤە رۆژا 16 مەھێ ھێزێن ئەولەھیا ئیرانێ ل سینۆرێ باژارێ «نەوسوودێ» ل گەل باشوورێ کوردستانێ ژی گولـلە ل کۆلبەران بەردانە و د ئەنجامێ دە 2 کۆلبەرێن دن ب گرانی بریندار بوونە.
ھات راگەھاندن ناڤێ یەک ژ وان برینداران «ئەمیرە» و خەلکێ گوندێ «دەمیۆ» یا سەر ب باژارێ «شەولاوا»یە، لێ ناڤێ بریندارێ دن نەھاتیە زانین.
