رەوشا ئێزدیان ل شەنگالێ پر خەرابە، رۆژ ل پەی رۆژ بەر ب خەرابتربوونێ ڤە دچە و دکەڤە بن خەتەریێن بێتر دە، سەدەما سەرەکە ژی حکوومەتا ئیراقێ ب خوەیە کو شەنگال و ئێزدی پاشگوهکرنە و ئەو د بن رەحما میلیشیایێن حەشدا شەعبی و هەڤکارا وان پەکەکێ دە ب جی هشتنە، نها ب تەنێ دو بژاردە ل همبەر گەلێ مە یێ ئێزدی هەنە، یان وێ جارەکە دن ئاوارە ببە و ناڤا کۆنان دە ژیان بکە، یانژی وێ د بن دەستهلاتا گرووپێن میلیشیا و چەکدارێن هۆڤ دە ژیان بکە کو ئەڤ ب خوە ژی فەرمانەکە دنە.
حکوومەتا ئیراقێ ل همبەر رەوشا ئێزدیان بەرپرسیارە، ژ بەر کو تو جاری حکوومەتا ئیراقێ ب ئەرکا خوە یا مرۆڤایەتی و ئەخلاقی ل همبەر ئێزدیان رانەبوویە و تو جاران نەخوەستیە ئێزدیان ژ ڤێ رەوشا نەخوەش رزگار بکە، ژ بەر ڤێ یەکێ ب دەهان ئیزدی یێن بووین قوربانیێن سیاسەتا شاشا ئیراقێ و گرووپێن دەریاسا.
ب تومەتێن سەختە یێن وەکە پێدانا ئاگاهیان ب دەولەتا ترک پەکەکێ چەندین ئێزدی زندانی کرنە
بۆمبەبارانکرنا بارەگەهێ پەکەکێ یێ ل خانەسۆرێ ل رۆژا 23/5/2023 بەلگەیەک زەلالە ل سەر خەرابیا رەوشا ئێزدیان د بن دەستهلاتا پەکەکێ دە، هەر دەما دەولەتا ترک جیەکی بۆمبەباران دکە، پشترە پەکەکە هەژمارەک ژ ئێزدیان ب سووچا پیدانا ئاگاهیان ب دەولەتا ترک و بێی تو بەلگە و بێی بریارا داگەهێ دەستەسەر دکە، وان ئیشکەنجە دکە و ب دارێ زۆرێ ئیتیرافێ ب وان ددە کرن کو ئالیکاریا ترکیێ کرنە.
دەما ل رۆژا 25/5/2023 فرۆکەیەکا ترکیێ بارەگەھەکە پەکەکێ ل ناڤچەیا خانەسۆرێ کری ئارمانج پەکەکێ وەکە هەرجار هەژمارەک ژ ئێزدیان ب سووچا پێدانا ئاگاهیان ب دەولەتا ترکیێ دەستەسەر کرن. ئەڤ نە جارا یەکەمە پەکەکە ب ڤی ئاوا تەڤ دگەرە، پێش نها ژی چەندین کەس ب سووچێن بێ بنەما دەستەسەرکرنە و ئەو ئیشکەنجە کرنە، میناکا هەری بەربچاڤ ژی دەستەسەرکرنا «سەعید ئاشوورە» کو پشتی بۆمبەبارانا بارەگەهەکی پەکەکێ هاتیە دەستەسەرکرن و ب کوشتن دایین.
چیرۆکا سەعید ئاشوور ب ڤی ئاوایە:
«سەعید ئاشوور عەبدوللا» نیشتەجیەکی شەنگالێ یە، ئەو ژ هۆزا ئەل-دەخی یە، ل خانەسۆرێ بجی بووبوو، کارمەندێ رێکخراوا MAG یا هلگرتنا مین و تەقەمنیان بوو، کەسکی دوور بوو ژ کارێن سیاسی و ئارمانجا وی ب تەنێ دروستکرنا ژیانەک خوەش ژ زارۆک و مالباتا خوە رە بوو، لێ بوو قوربانیێ سیاسەتا دوژمنکارانە یا پەکەکێ.
چاڤکانیێن پێگەها دارکا مازی ئەشکەرە کرن، مالباتا سەعید ئاشوور سەری ل سازیێن سەر ب پەکەکێ ل شەنگالێ دان و داخوازا ژ وان کر سەعید ژی سەربەست بەردەن، لێ بەلێ پەکەکە رازی نەبوو سەعید ئازاد بکە و مالباتا وی تەهدید کر، پشترە پەکەکێ سەعید ژ بۆ زندانەکێ ل گوندێ خەلەف قاسم بر و ل ور ئەو ب ئاوایەکی هۆڤانە ئیشکەنجەکر هەیا کو ئیتیرافێ بکە، لێ ب ت ئاوا سەعید ئیتیراف نەکر، وی هەر تم ژ پەکەکێ رە دگۆ ئەز بێی گونەهم و من چ سووچ نەکرنە.
سەعید ل رۆژا 23/5/2023 د ئێریشا بالافرێن شەر یێن دەولەتا ترکیێ ل سەر بارەگەهەکی پەکەکێ کو زندانەک بچووک ژی تێدەیە بوو قوربانی و هات کوشتن، لێ مالباتا سەعید ئاشوور ژ بەر گەفێن پەکەکێ نکارن راستیا کوشتنا وی ئەشکەرە بکن و جیەکی دن وەک جیێ قوربانی بوونا سەعید ب دەستێ بالەفرێن ترکیێ ددن نیشاندان.
ل ڤڕ چەندین پرسێن جەوهەری سەر هل ددن:
گەلۆ چەوا دبە ل بەر چاڤێ سازیێن حکوومەتا ئیراقێ پەکەکە ب کێفا دلێ خوە کەسێن سڤیل دەستەسەر بکە ؟ گەلۆ رۆلا دامودەزگەهێن ئەولەهی یێن حکوومەتا ئیراقێ ل شەنگالێ چییە؟ هەبوونا دادگەهێ ل شەنگالێ چ واتەیا خوە هەیا دەما بێی فەرمانا دادگەهێ پەکەکە ب کێفا دلێ خوە کەسێن سڤیل دەستەسەر بکە؟ گەلۆ ب راستی ژی ب کیژان یاسایێ کەسێن “سووری و ترکی” ل شەنگالێ چەک هلدگرن و ولاتیێن ئیراقێ دەستەسەر دکن و وان ئیشکەنجە دکن؟ ئەڤ ئەو پرسن کو گەلێ مە یێ ب رۆمەت یێ ئێزدی ژ حکوومەتا ئیراقێ دکە.
