ئەندامەکی کۆمیتەیا ئاساییش و بەرەڤانیێ یا جڤاتا نوونەرێن ئیراقێ دبێژە، وەلاتیێن سڤیلێن کامپا مەخموورێ ژ کریارێن نەیاسایی یێن پەکەکێ بێزار بوونە و پێشوازیێ ل ھەر ھەولەکا ژ بۆ بداویکرنا سەروەریا پەکەکێ ل سەر کامپا وان دکن.
ئیرۆ پێنجشەمبی 25/5/2023، مەریوان قەرەنی ئەندامێ کۆمیتەیا ئاساییش و بەرەڤانیێ یا پارلامەنتۆیا ئیراقێ د داخویانیەکێ دە راگهاند، “ژ دەستپێکا ڤێ حەفتیێ ڤە سوپایێ ئیراقێ ل سەر فەرمانا محەمەد شیاع سوودانی، فەرماندەیێ گشتییێ هێزێن چەکدارێن ئیراقێ، ب مەرەما تەلبەندکرنا کامپا مەخموورێ کەتنە تەڤگەرێ، لێ بەلێ ل گۆر ئاگاهیێن مە پارتیا کارکەرێن کوردستانێ (پەکەکێ) ب دو ئاوایان ئاستەنگی ل سەر سەرکەفتنا ڤێ پلانێ چێکریە، یا یەکەم: زەخت ل گەلێ سڤیل یێ مەخموورێ کریە و ب گەف و تەهدیدا ئەو نەچار کرنە ل دژی ڤێ هەولا سوپایێ ئیراقێ بسەکنن! د دەمەکی دە گەلێ سڤیلێ مەخموورێ ب خوە ژ دەستێ پەکەکێ و کارێن وێ یێن نەقانوونی و رەڤاندنا زارۆکان بێزا و پەریشانن. یا دویەمین: ھنەک ژ چەکدارێن پەکەکێ یێن کو ل کامپا مەخموورێ بەرپرسێن پەروەردەیا چەکداری یا خەلکێ سڤیلن، خوە وەکە سڤیل ددن ناسین و د دەما کۆمبوونا سڤیلان دە ھەول ددن ئێرشی ھێزێن ئەولەھیێ بکن و ئالۆزیێ چێکن.”
دا زانین ژی، کامپا مەخموورێ ژ رۆژا کو ژ بۆ پاراستنا جانێ خوشک و برایێن کورد ل باکورێ کوردستانێ ھاتیە دامەزراندن، کامپەکە سڤیلان بوو و ئەولەھیا سڤیلان ژ بەرژەوەندیێن تەنگێن حزبی گرنگترە. لۆما “ژ ڤر ئەم پشتەڤانیێ ل هەر هەولەکی دکن کو ژ بۆی پاراستنا ئەولەهیا روونشتڤانێن ڤێ کامپا سڤیلان بێ ئاڤێتن. بەرۆڤاژی ڤێ یەکێ، ئەم ل دژی ھەر ھەولدانا بکارئانینا ڤان کەسان ژ بۆ بەرژەوەندیێن تەنگێن حزبی، خاپاندن، چەکدارکرن، ڤەگوھەرتنا کامپێ بۆ ناڤەندەکە پەروەردەیا چەکداری و رەڤاندنا زارۆکانە، و دڤێت ب توندی سینۆرەک ژ وان کەسان رە بێ دایین یێن کو ڤان کاران دکن.”
مەریوان قەرەنی تەکەز کر، ژ بلی کامپا مەخموورێ، رەوشا کەرکووک و شەنگال و تەڤ ناڤچەیێن کورستانی یێن دەرڤەی ئیدارەیا هەرێما کوردستانێ وێ دەمێ دێ ئارام بە کو هێزێن نە قانوونی د ڤان ناڤچەیان دە بێن چەککرن و دەرکرن و لهەڤهاتنا د نێڤبەرا حکوومەتا هەرێما کوردستانێ و حکوومەتا فەدەرالا ئیراقێ د دەربارا رەوشا وان ناڤچەیان بێ جیبجیکرن، ژ بەر کو “مانا رەوشا وان ناڤچەیان ب ڤی ئاوایێ نها، دبە سەدەما زەرەرمەندبوونا زێدەترا کەسێن سڤیل.”
