سەلاحەدین دەمیرتاش ئەشکەرە دکە، وی خوەستیە کو ببە کاندیدێ سەرۆککۆماریا ترکیێ، لێ ھەدەپێ داخوازا وی رەد کریە.
ھەڤسەرۆکێ بەرێ یێ ھەدەپێ یێ زیندانیکری سەلاحەدین دەمیرتاش د ھەڤپەیڤینا لگەل “ئارت گەرچەک” ددە زانین، پێش گەنگەشەیێن دەستنیشانکرنا کاندیدیا سەرۆککۆماریێ، وی ژ ھەدەپێ رە ئامادەبوونا خوە یا ژ بۆ کاندیدیێ راگھاندیە. لێ ھەدەپێ بێیی نیشاندانا هیچ بەهانەیەکێ داخوازا وی رەد کریە و ئەو ھەتا نھا ژی بەهانەیا رەدکرنێ نزانە.
ھەر وھا دەمیرتاش دوھی ژی ل ھەژمارا خوەیا تۆرا جڤاکی راگھاندبوو کو وی دەست ژ سیاسەتا ئەکتیف بەردایە.
ھەدەپێ بێ دەستنیشانکرنا کاندیدەکێ بۆ پۆستا سەرۆککۆماریا ترکیێ بەشداری ھلبژارتنان بوو و د گەرا یەکەم و دویەما ھلبژارتنێن سەرۆککۆماریا ترکیێ دە، پشتەڤانی دابوو کەمال کلچدارۆغلو.
دوھی ژی ھەدەپێ د داخویانیەکا ھەڤبەش دە لگەل یەپەسێ، دەبەپێ، ھەدەکێ و دەتەکێ راگھاند: “ئەم قەبوول دکن کو د ھلبژارتنێ دە ئەم نەگھیشتن ئارمانجێن خوە و ل گۆر ڤان ئارمانجان ئەم ب سەر نەکەتن.”