دادگەها مافێن مرۆڤان یا ئەورۆپایێ، ل سەر جەزایێ پارلامەنتۆیا ترکیێ کو ژ بەر بکارئانینا پەیڤا «کوردستانێ» دابوو ئۆسمان بایدەمر، بریارا بنپێکرنا ئازادیا رادەربرینێ دا. ترکیە دێ 16 هەزار و 957 یۆرو قەرەبوویێ بدە بایدەمیر.
سالا 2017ان دەما ئۆسمان بایدەمر پارلامەنتەرێ رهایێ بوو ل پارلامەنتۆیا ترکیێ د ئاخافتنەکە خوە دە گۆتبوو: «ئەز وەکە زارۆکەکی گەلێ کورد، وەکە نوونەرەکی ژ کوردستانێ هاتمە رۆلا خوە وها دیار دکم: بلا ئەڤ بان ببە بانێ هەڤبەشێ کورد و ترک».
سەرۆکاتیا پارلامەنتۆیا ترکیێ وێ دەمێ بریار دابوو کو بایدەمیر بەشداری دو جڤینێن پارلامەنتۆیێ نەبە و ژ مووچەیێ وی 2 ل سەر 3 بێ برین.
بایدەمیر ل بەرامبەر جەزایێ پارلامەنتۆیا ترکیێ ب هنجەتا د دەما کارێن یاسادانینێ دە ئازادیا وی یا رادەربرینێ هاتیە بنپێکرن سەری ل دادگەها دەستوورێ یا ترکیێ دابوو، پشتی کو دادگەها دەستوورێ سەرلێدانا وی رەد کر، سەری ل دادگەها ئەورۆپایێ دابوو.
دادگەها ئەورۆپایێ دەربارێ سەرلێدانا بایدەمیر دە بریارا خوە دا و راگهاند کو مافێ ئازادیا رادەربرینێ یا بایدەمیر هاتیە بنپێکرن. دادگەهێ هەروها بریار دا، دەولەتا ترکیێ 9 هەزار و 750 قەرەبوویا مەنەوی، ب تەڤاهی 16 هەزار و 957 یۆرو وەک قەرەبوو بدە بایدەمیر.
ئۆسمان بایدەمیر پشتی بریارا دادگەها ئەورۆپایێ ل سەر حه‌سابا خوە یا تویتتەرێ نڤیساندیە: «ئەڤ بریار د تێکۆشینا ئازادییا رامانێ دە خوەدی گرینگیەک دیرۆکی یە. روومەتا رەوا یا ڤێ سەرکەفتنێ یا ب ملیۆنان کوردە کو ئەو کوردستانێ د دلێ خوە دە و خەون-خەیالێن خوە دە زیندی دهێلن».
