سازیا ئیستخباراتا ترکیێ (میت) یەک ژ بەرپرسێن پەکەکێ یێ ب ناڤێ عەبدولقەھار کاراساچ کو ل گۆر داخویانیا چاپەمەنیا ترکیێ بەرپرسبوویە ژ چالاکیەکا سالا 2017 ب ئۆپەراسیۆنەکێ کوشت.
ل گۆر نووچەیا ئاژانسا ئانادۆلو یا ترکیێ، ئیستخباراتا ترکیێ میتێ، بەرپرسێ چالاکیا سالا 2017 یا پەکەکێ کو ل ھەمبەر دادگەھا ئیزمیرێ پێکھاتبوو و تێدا پۆلیسێ ب ناڤێ فەتحی سەکن ھاتبوو کوشتن د ئۆپەراسیۆنەکا تایبەت دا یا ل ھەرێما کوردستانێ کوشتیە.
ل گۆر چاڤکانیێن ئەولەھیێ راگەھاندیە، د ئێریشا سالا 2017 ل ئیزمیرا ترکیێ، پۆلیسێ ب ناڤێ فەتحی سەکن و کاتبێ زابت موسا جان ژیانا خوە ژ دەست دابوون و کەسێ ب ناڤێ عەبدولقەھار کاراساچ کو ناڤ پەکەکێ دە وەک عەلیشێر چیا دھاتە ناسکرن، پلانا وێ چالاکیێ کریە و فەرمانا پێکھاتنا وێ چالاکیێ وێ دایە و پشتی وێ چالاکیێ ژی ئەو بەرپرسێ پەکەکێ ژ ئالیێ میتێ ڤە ھاتیە شۆپاندن.
ل گۆر ھەمان چاڤکانیێ عەلیشێر چیا د ناڤ پەکەکێ دە وەک بەرپرس بوویە د ھێزێن تایبەتێن پەکەکێ دە و ب ئۆپەراسیۆنەکێ ھاتیە کوشتن.
ھەروھا ھات راگەھاندن عەلیشێر چیا ل ئیراق (ھەرێما کوردستانێ) و ھەروھا ل باکورێ سووریێ (رۆژئاڤایێ کوردستانێ) بەشداری کار و خەباتێن پەکەکێ بوویە و ژ پلان کرن و پێکانینا ئێریشێن ب درۆنێن پەکەکێ بەرپرس بوویە.
