په‌ده‌كه‌سێ محەمەد ئیسماعیل وەک سەکرەتەرێ خوە یێ نوو هلبژارت

پارتیا دەمۆکاراتا کوردستانێ – سووریە (PDK-S) ئیرۆ 15ێ هەزیرانا 2023ان، محەمەد ئیسماعیل وەک سەکرەتەرێ نوو یێ وێ پارتیێ هلبژارت.

پشتی کو رۆژا 12ێ هەزیرانا 2023ان، کۆنگرەیا 12مین یا پارتیا دەمۆکراتا کوردستانێ – سووریە (PDK-S) ب داوی بوو و 27 ئەندامێن کۆمیتەیا ناڤەندی یا پارتیێ هاتن هلبژارتن. ئیرۆ ل هەولێرێ جڤینا کۆمیتا ناڤەندی هات لدارخستن.

ل گۆری زانیاریێن كوردستان 24ێ، د جڤینێ دە، محەمەد ئیسماعیل وەک سەکرەتەرێ نوویێ PDK-S هلبژارت. هەر وها د. ئەبدولحەکیم بەشار و کامیران حاجۆ وەک جیگرێن سەکرەتەری هاتن هلبژارتن.

هەر د ڤێ جڤینێ دە ژی، د. ئەبدولحەکیم بەشار، د. لەزگین فەخری، نافێ بەیرۆ، کامیران حاجۆ و سەعید عومەر وەک ئەندامێن پۆلیتبورۆیا پارتیێ هاتن هلبژارتن.

پارتیا دەمۆکراتا کوردستانێ – سووریە (PDK-S) وەک یەکەمین پارتیا کوردی ل رۆژئاڤایێ کوردستانێ، د 14ێ هەزیرانا 1957ان دە هاتیە دامەزراندن.

محەمەد ئیسماعیل کی یە:

محەمەد ئیسماعیل، د سالا 1958ان دە ل گوندێ سوێدیێ یێ ژۆرین ژداییک بوویە، دبستانا ناڤین و ئامادەیی ل باژارێ دێرکێ خوەندیە. سالا 1980ی ژی ژ فاکولتەیا کیمیایێ یا زانینگەها شامێ دەرچوویە.

محەمەد ئیسماعیل سالا 1976ان تەڤلی ناڤا رێزێن پارتی بوو. د سالا 1998ان دە بوو ئەندامێ کۆمیتەیا ناڤەندی و د سالا 2002ان دە ژی بوو ئەندامێ پۆلیتبورۆیێ.

محەمەد ئیسماعیل،  یەک ژ ناڤدارترین رەوشەنبیرێن تەڤگەرا کوردی ل سووریێ تێ زانین، هەر وها وەک ئەندەزیارێ چارچۆڤەیێن یەکگرتی یێن وەکی هەڤبەندی، ئەنی، لێڤەگەرا سیاسی، یەکیتیا سیاسی و پرۆژەیا یەکخستنا چار پارتیان و دامەزراندنا پارتیا دەمۆکراتا کوردستان – سووریێ (PDK-S) تێ ناسکرن.

د کۆنگرەیا PDK-S یا 2014ان دە، بوو بەرپرسێ ئیداری یێ پۆلیتبورۆیا PDK-S، بەرپرسێ مەدیایا ناڤەندی و بەرپرسێ پێوەندیێن دەرڤە.