ئارتێشا ترکیێ هەژمارەک گوندێن عه‌فرینێ و هەرێما شەهبایێ یێن د بن کۆنترۆلا یه‌په‌گ و هێزێن رێژیما سووریێ دە نە تۆپباران کرن.
هات راگهاندن، ئارتێشا ترکیێ و گرووپێن چەکدارێن سەر ب وێ ڤە ئیرۆ 17ێ خزیرانا 2023ان گوندێن دەردۆرا بێنێ، سۆخانەکێ و ئاقیبا تات ماراش و تنب یێن عه‌فرینێ و گوندێن تل عەناب و تل جیجان یێن ل هەرێما شەهبایێ تۆپباران کرن.
ل گۆری زانیاریان ژی، د ئەنجاما تۆپبارانێ دە، ئاگر ب زەڤیێن وەلاتیان کەتیە و هەتا نها ژی تۆپباران بەردەوامە.
دوهی ژی ئارتێشا ترکیێ و گرووپێن چەکدارێن سەر ب وێ ڤە ناڤەندا ناحیا تل رفعەتێ تۆپباران کربوو و تۆپەک ژی ل نەخوەشخانەیا تل رفعەتێ کەتبوو و د ئەنجامێ دە 4 کەس بریندار بووبوون.
ئارتێشا ترکیێ و گرووپێن چەکدارێن ئۆپۆزیسیۆنا سووریێ دەما ئادارا 2018ان هەرێمێ عه‌فرینێ داگیر کربوون، 12 گوندێن ل ئالیێ باشوورێ رۆژهلاتێ عه‌فرینێ د دەستێ یه‌په‌گێ دە مان.
رەوانگەها سووری یا مافێ مرۆڤان ژی ئیرۆ بەلاڤ کر، هەژمارەک تۆپ ل کامپا ترندێ یا ل عه‌فرینێ کەتن و د ئەنجامێ دە 5 کەس بریندار بوون.
ل گۆری زانیاریێن رەوانگەهێ ژی، ئەو تۆپ ژ ناڤچەیێن باکورێ حەلەبێ یێن د بن کۆنترۆلا هێزێن رێژیما سووریێ و یه‌په‌گێ دە هاتنە ئاڤێتن.
چەند رۆژن ئارتێشا ترکیێ و گرووپێن چەکدارێن سەر ب وێ ڤە، ئێریشێن خوە ل سەر ناڤچەیێن باکورێ حەلەبێ و منبجێ یێن کو د دەستێ یه‌په‌گێ/هه‌سه‌دێ دە نە، زێدە کرنە.
