تركیێ سندۆقا ره‌ش یا په‌كه‌كێ كوشت
ئه‌ندامێ كۆنسه‌یا كه‌جه‌كێ ئه‌سات فه‌راشین د ئێریشه‌كا تركیێ ده ل رۆژئاڤا كوردستانێ هات كوشتن، ئه‌ڤ كادرۆیێ هێلا ژوور ب سندۆقا ره‌ش یا په‌كه‌كێ تێ ناس كرن.
ئاژانسا فه‌رمی یا تركیێ ئه‌نادۆلێ دوهـ رۆژا ئینی 23/6/2023ان راگه‌هاند كو ئه‌ندامێ كۆنسه‌یا كه‌جه‌كێ، یێ ب ناڤێ عه‌بدولره‌حمان چادرجی ب ناڤێ كۆد ئه‌سات فه‌راشین د ئێریشه‌كی سیهایێ ده ل باژارێ قامشلۆهاتییه كوشتن.
ل گۆری ئاگاهیێن داركا مازی جیهێ كو عه‌بدولره‌حمان لێ هاتییه ئارمانج گرتن نه‌‌هاتییه دیاركرن، لێ گۆمان هه‌یه ل ناڤبه‌را تل ته‌مرێ و قامشلۆیێ ده به و ل 20 هزیرانێ ده بوویه هه‌ده‌ف.
ئه‌سات فه‌راشین كی یه؟
عه‌بدولره‌حمان چادرجی ب ناڤێ كۆد ئه‌سات فه‌راشین، كادرۆیێ په‌كه‌كێ و ئه‌ندامێ كۆنسه‌یا كه‌جه‌كێ یه ل سالا 1956 ل باژارێ ئۆرفایێ ژ دایكبوویه.
ل سالا 1976ان ته‌ڤلی ره‌فێن په‌كه‌كێ بوویه.
چادرجی ل سالێن هه‌شتێیان ده كه‌تییه زیندانێ ل ئامه‌دێ، پشتی ژ زیندانێ ده‌ركه‌تی ل دۆلا بیقاعێ ل گه‌ل ئۆجه‌لان په‌روه‌رده دیتی یه.
پشتره ده‌رباسی بۆتانێ و باكورێ كوردستانێ بوویه.
ل سالا 1997ان ده‌رباسی ئه‌ورۆپا بوویه و ل وێ ده‌رێ بوو به‌رپرسێ كۆڤارا سه‌رخوه‌بوون یا په‌كه‌كێ و ل هه‌مان ده‌مێ ل كۆردیناسیۆنێن په‌كه‌كێ یێن ئه‌ورۆپایێ جیهـ گرت.
چادرجی ل سالا 2003 ڤه‌دگه‌ره قه‌ندیلێ، ژ به‌ر كو ئه‌و ل ئه‌ورۆپا ژی كه‌تبوو لیستا ته‌رۆرێ.
ل قه‌ندیلێ د كۆمیته‌یا دیپلۆماسی ده جیهـ دگره.
ل سالێن 2008 و 2010ان د رێڤه‌به‌رییا په‌كه‌كێ یا رووسیایێ ده جیهـ دگره.
ل 2017ان ده‌رباسی رۆژئاڤا كوردستانێ دبه.
ل 2018ان ل كۆنسه‌یا كه‌جه‌كێ تێ هه‌لبژارتن.
چادرجی وه‌ك سندۆقا ره‌ش یا په‌كه‌كێ تێ ناسكرن.
كادرۆیێن په‌كه‌كێ یێن ل رۆژئاڤا كوردستانێ ژ بۆ كو نه‌بن هه‌ده‌فا بالافرێن كه‌شفێ، ل گه‌ل كه‌سێن سڤیل و ب ئۆتۆمۆبیلێن سڤیل حه‌ره‌كه‌تێ دكن، ئانگۆ رێڤه‌به‌رێن په‌كه‌كێ كه‌س و رێڤه‌به‌رێن سڤیل وه‌كه مه‌رتال بكارتینن، لێ دیسا دبن هه‌ده‌ف.
ئاژانسا ئه‌نادۆلێ دیمه‌نێن كو چادرجی تێ ده هاتییه ئارمانج گرتن وه‌شاندن، په‌كه‌كێ ژی ل سه‌ر ڤێ مژارێ هه‌تا نها چ داخۆیانی نه‌دا نه.
په‌كه‌كه ل باشوورێ كوردستانێ په‌ده‌كێ ب كوشتنا كادرۆیێن خوه به‌پرسیار دبینه، لێ ل سه‌ر رێڤه‌به‌رێن وان یێن ل رۆژئاڤا تێن كوشتن چ داخویانییان ناده.
