گرووپێن چەکداران یێن ئۆپۆزیسیۆنا سووریێ یێن لگەل ئارتێشا ترکیێ ھەرێما عەفرینێ داگیر کرنە، 4 خۆرتێن کورد رەڤاندن.
رێخستنا مافێن مرۆڤان ل عەفرینێ ئیرۆ 25 خزیرانا 2023 د راپۆرتەکێ دە بەلاڤ کر، گرووپەکا ژ میلیشیایا “پۆلیسێن ئازاد” دوھی 24 خزیرانێ ب سەر گوندێ کورزێلا جوومێ دە گرت و بێی کو رێزی ل مالان بگرە، کەتن مالێن گوندیان و ب تۆمەتا کو “د سەردەما رێڤەبەریا خوەسەر دە ئەرکێ خوەپاراستنێ کرنە”، 4 خۆرت رەڤاندن.
خۆرتێن ھاتینە رەڤاندن ناڤێن وان وھا نە: ئالدار ئەحمەد عەبدۆ، رێزان حوسێن عۆسمان، حەموودێ ئەحمەد وەحید و فەرھاد ئەحمەد وەحید.
ل گۆری زانیاریێن رێخستنا مافێن مرۆڤان، 3 ژ وان خۆرتان پێشتر ژی ژ ئالیێ گرووپا ھەمزات ڤە ھاتبوون رەڤاندن و پشتی کو فیدیە دابوون ھاتبوون بەردان.
ژ دەما داگیرکرنا عەفرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە د ئادارا 2018 دە، زێدەتر ژ 8 ھەزار کوردێن عەفرینێ ھاتنە رەڤاندن و ھەتا نھا ھەژمارەک ژ وان هێژ رەڤاندی نە.
ل گۆری چالاکڤانێن عەفرینێ، ئەڤ کریارێن رەڤاندنێ د چارچۆڤەیا شەرێ چەکداری ل دژی نشتەجھێن رەسەنێن کورد تێن، ب ئارمانجا ستاندنا فدیەیێ و ئەنجامدانا فشارا ل سەر وان ژ بۆ کو ژ گوند و ملکێن خوە کۆچبەر ببن.
