ئەنجوومەنا نیشتیمانییا کوردی ل سووریێ (ئەنەکەسە) کۆمکوژیا کو ژ ئالیێ فرۆکەیێن رووسیایێ ڤە ل باژارێ جسر ئەل-شخوورێ ھاتیە کرن، شەرمەزار دکە و بانگ ل جڤاکا ناڤدەولەتی و ئالیێن پێوەندیدار دکە، لەزێ بدن چارەسەریا سیاسی ل سووریێ.
سەکرەتەریا گشتییا ئەنەکەسێ ئیرۆ د داخویانیەکێ دە راگھاند، “رۆژا 25 خزیرانێ فرۆکەیێن شەرێ رووسی، ب ھەماھەنگیا لگەل رێژیمێ، بازارەکێ گەلەری ل باژارێ جسر ئەل-شخوور ئارمانج کرن، کو د ئەنجامێ دە گەلەک کەس بوون قوربانی و ب دەھان سڤیل بریندار بوون، ھەر وھا بوو سەدەما کۆچبەربوونا خەلکێ ژ ناڤچەیێن کو مێڤانداریا زیاندیتیێن ئەردھەژا 6 سباتێ کربوو.”
ئەنەکەسێ گۆت، “ئەڤ ئێریش پشتی چەند رۆژان ژ بداویبوونا گەرا 20 یا جڤینێن ئاستانایێ ھات، کو یەک ژ سەرناڤێن وێ کێمکرنا ئالۆزیێ ل وان دەڤەران بوو.”
ئەنەکەسە دبێژە: “ئەم ڤێ تاوانا ھۆڤانەیا ل دژی سڤیلێن بێگونەھ شەرمەزار دکن، ئەم بانگ ل جڤاکا ناڤدەولەتی، ب تایبەتی ل ئالیێن پێوەندیدار دکن، کو بلەز تەڤبگەرن دا کو داوی ل تاوانێن ب ڤی رەنگی بینن، لەزێ بدن جێبەجێکرنا پێنگاڤێن چارەسەریا سیاسییا ناڤدەولەتی، ل گۆری بریارێن کۆنگرەیا جەنێڤێ و بریارا 2254 یا نەتەوێن یەکگرتی، ژ بۆ راوەستاندنا بنپێکرن و ستەمێن ل سەر گەلێ مەیێ سوورییێ کو داخوازا ئازادی و ئاشتیێ ل وەلات دکە.”
دوھی 25 خزیرانێ فرۆکەیێن رووسی بازارەکێ باژارێ جسر ئەل-شخوورێ یێ ل رۆژئاڤایێ ئدلبێ بۆمبەباران کر، ل گۆری رێخستنا بەرەڤانیا سڤیل ژی، د ئەنجاما ئێریشێ دە 9 کەسان جانێ خوە ژدەست دان و 61 کەس ژی بریندار بوون کو د ناڤا وان دە زارۆک ژی ھەنە.
