پاک: بکوژ و پشتگرێن کۆمکوژیا سێواسێ ھەتا ئیرۆ ژی نەھاتنە ئاشکەرەکرن

پارتیا ئازادیا کوردستانێ (پاک) ب داخویانیەکا نڤیسکی کۆمکوژیا مادماکا سێواسێ شەرمەزار کر و راگھاند، “ب مناسەبەتا ڤێ کۆمکوژیێ ھنەک دۆز ھاتن ڤەکرن. لێ مخابن چ ئەنجام ژێ نەھاتن گرتن.”

داخویانیا پاکێ:

د تەممووزا 1993 دا، ل سێواسێ، شاھییا پیر سولتان عەبدال ھاتە ل دار خستن. گەلەک رەوشەنبیر و ھونەرمەند ژی بەشداری ڤێ شاھییێ ببوون.

د رۆژا 2 تەممووزا 1993 دا قەلەبالخییەکا مەزن ئێریشەکە نە مرۆڤانە برن سەر ھۆتێلا مادماکێ یا کو بەشدارێن شاھییێ لێ دمان و ھۆتێل شەوتاندن. د ئەنجامێ دا 33 رەوەشەنبیر و ھونەرمەد و 2 خەباتکارێن ھۆتێلێ ھاتن شەوتاندن، ژ بەر دووخانێ فەتسین.

ئێریشکەران ب سلۆگانێن وەکە “سێواس ژ بۆ یێن هەژی دێ بیتە گۆر”، ل بەر چاڤێن پۆلیس و ھێزێن ئەولەکارییێ یێن دەولەتێ ئێریش بربوون سەر ھۆتێلێ.

ئەڤ ئێریشە بنپێکرنا مافێ ژیانێ بوو، ل دژی مافێ رامانی و باوەرییێن جودا بوو.

ب هەلکەفتا ڤێ کۆمکوژیێ ھندەک دۆز ھاتن ڤەکرن. لێ مخابن چ ئەنجام ژێ نەھاتن گرتن، بکوژ و پشتگرێن ڤێ کۆمکوژیێ ھەتا ئیرۆ ژی نەھاتنە ئاشکەرە کرن، نەھاتنە سزا دان.

ئەم بکوژ و ئێرشکەرێن ڤێ کۆمکوژیێ و یێن ل پشتا وان بوون، یێن وان دپاراستن ب تووندی روورەش دکن.

ئەم د 30 سالڤەگەرا ڤێ کۆمکوژیێ دا، قوربانییێن کۆمکوژیێ ب گرامی ببیر تینن.

2.7.2023

نڤیسینگەها چاپەمەنی و راگەھاندنێ یا پاکێ