پشتی زێدەتری 3 ھەفتەیان ژ گرتن و رەڤاندنێ، د رۆژەکە وەکە ئیرۆ دە د 28 خزیرانا 2021 دە، ھێزێن سووریا دەمۆکرات جوانێ کورد ئەمین عیسا ئەمین ل باژارێ حەسەکێ یێ رۆژئاڤایێ کوردستانێ د بن ئەشکەنجەیێ دە شەھید کر.
جوانێ کورد ئەمین عیسا بەریا کو بهێت شەھیدکرن، 27 رۆژ بوون ب دەستێ ھێزێن سووریا دەمۆکراتیک هەسەدێ ھاتبوو رەڤاندن، کو ب خوە ئەندامێ ئەنجوومەنا شاخی یا پارتیا دەمۆکراتا کوردستان – سووریا پەدەکە-سێ یە.
دەما مالباتا ئەمین عیسا تەرمێ وی وەرگرتی و هندەک وێنە بۆ تەرمێ وی گرتی دیار بوو کو ژ ئالیێ هەسەدێ ڤە ب ھۆڤیتی ھاتیە لێدان و ئەشکەنجەدان.
ھەروەھا راپۆرتەک ژ پزیشکی دادوەری دەرکەت تێ دە دیار بوو کو ب شێوەیەکی ھۆڤانە ھاتیە لێدان و ئەشکەنجەدان. راپۆرتا پزیشکیا دادوەری د 10 خالان دە ئاستا ئیشکەنجە و سەدەما جان ژ دەست دانا ئەمین عیسا ئاشکەرا دکە ب ڤی ئاوا:
1- شەکاندن د دەڤی دە.
2- شکاندن د ددانان دە.
3- لێدان د چۆک گۆزەکان دە.
4- لێدان ب ئالاڤێن تووژ د ستوو و پشتا سەری دە.
5- شەوتاندن د سەری تا داویا پشتێ دە ھەیە.
6- شوونا لێدانا توند ل سەر مەژی ھەیە.
7- شوونا لێدانا ب شەفەریێ ل سەر روویێ وییێ چەپێ ھەیە.
8- شەوتاندنا دەستان تا بن چەنگان دە.
9- لێدانا د زکی دە.
10- بکارئانینا ئەلەکتریکێ ل سەر پشتێ و ئەندامێن مێرانتیێ دە.
بەریا دو سالان ھەر یەک ژ ئەنجوومەنا نشتیمانییا کوردی ل سووریێ و پارتیا دەمۆکراتا کوردستان -سووریا داخوینیێن شەرمەزاریێ بەلاڤ کرن.
ئەنجوومەنا نشتیمانییا کوردی ل سووریێ و پارتیا دەمۆکراتا کوردستان -سووریا بانگا دادگەھکرنا تاوانباران کر، لێ تەڤی دەرباسبوونا دو سالان چ لێکۆلین نەھاتنە دەستپێکرن.
جوانێ کورد ژ شێنیێ گوندێ بیرکێ یێ سەر ب باژارێ درێبێسیێ یە، ژداییکبوویی سالا 1986، خێزاندار بوو و بابێ 2 زارۆکانە. ئەڤ تاوان نەیا یەکێیە د دیرۆکا پەیەدێ دە، ژ دەما کو دەستهەلاتداری ژ رێژیمێ وەرگرتیە ب سەدان تاوان د دەرحەق سیاسەتمەدار، وەلاتپارێز، و ئەندام و ئالیگرێن ئەنەکەسێ دە ئەنجام دانە، و ھین ژی د کریارێن خە دە بەردەوامە.
